Мектеп асханасын тексеру форматына өзгеріс енгізіледі

Елімізде мектептерді санитариялық-эпидемиологиялық қызмет мамандарының тексеруіне қатысты заңнамалық түзетулер енгізу жоспарланып отыр. Бұл туралы мәжіліс депутаты Асхат Аймағамбетов жазды.

Айтуынша, бұл бағытта бірнеше мәселе бар. Олар:

• Тексерулерді алдын ала ескерту қажет;
• Қызметкерлер өздерімен бірге рұқсат қағазын жинауға тиіс;
• Айыппұл мектеп директорларына салынады (басшының тікелей кінәлі болмаса да)
• Шынайы бақылау мүмкін емес.

Депутат ұсынылып отырған өзгерістер бұл мәселені шешуге мүмкіндік беретінін жазды. Айтуынша, бақылау басқа форматқа ауыстырылады.

• Енді алдын ала ескерту болмайды;
• Бастапқы тексерулерде айыппұл салынбайды, алдымен ескерту, кеңес, ұсыныс беріледі;
• Мектеп пен лагерьлерде жыл сайын оқу жылы алдында жоспарлы тексеріс жүргізіледі;
• Қаржылық шығынды талап ететін бұзушылықтар үшін директор емес, әкімдік жауапты болады;
• Балалардың өміріне қауіп төнген жағдайда жедел шаралар қолданылады: уақытша жабу, қызметкерді шеттету және т.б.; Мектеп асханаларының жеткізушілеріне арналған арнайы тізілім енгізіледі, жұмысын адал атқармайтындарға тосқауыл қойылады.

Айта кетейік, 2025 жылдың 1 қыркүйегінен бастап, елдегі мектеп асханаларында бірқатар азық-түлік түрлерін сатуға тыйым салынады.