Алаяқтар мемқызметкерлерге міндеттелген Aitu мессенджерін бүркеніп, алдауға көшті

Желіде Aitu мессенджеріне қажетті кодты сұрап хабарласқан алаяқтық әрекет видеосы таралып жатыр.

Видеода өзін Диана деп таныстыратын әйелмен телефон әңгімесі көрсетілген. Ол ескерту жүйесі арқылы алты таңбалы код жібергенін, соны айтуды сұрайды. Код Aitu_pass деген нөмірден келген.

Алайда қолданушылар мұның алаяқтық әрекет екенін аңғарып, жалған код айта салады. Телефон тұтқасының арғы жағындағы адам код қате екенін, бұл өздері үшін керек, сондықтан дұрыс кодты айтуды, әйтпеген жағдайда, айыппұл салытанытынын жеткізіп кодты айтуға көндіруге тырысады.

Оператормын деген адамның даусында ойы іске аспағанына ашуланғаны байқалады.

Жеке деректерге қол жеткізу үшін код жіберіп, соны атауды сұрайтын схема алаяқтар арасында кең таралған.

Банктер мен мемлекеттік органдар ешқашан жіберген кодты ешкімге айтпауды сұрайды. Тіпті жіберілген смсте де кодты бөтен адамға айтпау туралы жазылады.

Айта кетейік, 12 тамызда үкімет мемлекеттік органдар толығымен Aitu мессенджеріне өтетінін хабарлады. Aitu қосымшасын қазақстандық Kazdream Technologies IT-холдингі әзірлеген, ол BTS Digital цифрлық экожүйесінің құрамына кіреді.

Ал Цифрлық даму министрі Жаслан Мәдиев мемлекеттік қызметкерлер аталған мессенджерді қолдануға міндеттелетінін, бұл құжат жібергендегі қауіпсіздік үшін керек екенін айтқан.