Ауыл шаруашылығы министрлігі елде сиыр етінен тапшылық болмайды деп сендіреді. 2025 жылғы 7 айындағы нақты деректер саладағы тұрақтылық пен оң динамиканы көрсеткен.
Шілде айының соңындағы жағдай бойынша ірі қара мал басы 8,7 млн басқа жеткен, оның ішінде 4,5 млн-ы сиыр (+3,1%). Бұзау саны 2,7 млн басқа дейін өскен (+17,9%).
Ет неге қымбаттады
Ет өндірісі оң динамика көрсеткенімен баға қарқынды түрде өсіп жатыр. Министрлік мұны селекциялық-асыл тұқымдық жұмысты субсидиялау тоқтатылғанымен, энергия ресурстарының қымбаттауымен (электр энергиясы +11,3%, газ +15,9%, су +96%-ға дейін), жем-шөп, ЖЖМ, ветеринарлық препараттар құнының артуымен байланыстырады. АӨК-дегі жалақы көтеріліп, жеткізу тізбегіндегі делдалдар да қымбатшылыққа өз әсері һн берген.
Министрлік мәліметінше, өндірушілерде ірі қара малдың тірідей салмақтағы көтерме бағасы келісіне 2400–3100 теңге, бөлшек саудада – 3000–3700 теңге аралығында.
Ал базарда сиыр еті келісіне 4500 теңгенің о жақ, бұ жағында саудаланып жатыр.
Бұған дейін, Астанада екі ай бойы демалыс күндері жәрмеңке өтетінін жазғанбыз.
