Президент геосаяси тұрақсыздық кезеңінде заңнаманы жаңғыртудың маңызын атап өтті
Президент Қ.Тоқаев конституционализм ешқашан бір орында тұрмайтынын мәлім етті.
Оның сөзінше, геосаяси тұрақсыздық белең алып, технология көз ілеспес жылдамдықпен дамып жатқан кезеңде заңнаманы ұдайы жаңғыртудың маңызы зор.
Жаппай цифрландыру және жасанды интеллект мемлекет пен қоғамды өркендетудің мүлдем жаңа ұғымдары мен тәсілдерінің пайда болуына ықпал еткен.
«Көптеген елде адамның рөлі мен орны, жалпы оның постгуманистік әлемде тіршілік етуі жөнінде қоғамдық және парламенттік пікірталастар қызу жүріп жатыр. Биотехнологияның жедел дамуы да біраз сұрақ туындатады. Оның салдары күрделі құқықтық коллизияға және қалыптасқан этикалық нормалардың ескіруіне әкеліп соғуда», – деді ол Конституциясының 30 жылдығына арналған конференцияда.
Президент заң шығарушылар халықаралық құқық жүйесін қайта құру арқылы өз елінің егемендігін сақтау міндетімен бетпе-бет келіп отырғанына назар аударды.
«Сондықтан конституционализм ешқашан бір орында тұрмайды. Ол заң шығару үдерісімен тығыз байланысты. Алайда оған мүлдем жаңа технологиялық, экономикалық және геосаяси жағдайлар әсер етеді. Бұл мәселені Қазақстанның кәсіби заңгерлер қауымдастығы жан-жақты зерттеп, ұдайы назарда ұстауға тиіс деп санаймын», – деді президент.
Жиын барысында Тоқаев конституцияға енгізілген өзгерістерді тілге тиек етіп, президенттің жеті жылға бір рет қана сайлануы маңызды саяси бетбұрыс екенін айтқан.
