Қаржылық мониторинг агенттігі мемлекеттік қорғаныс тапсырысы саласындағы қаражатты жымқырды деп айыпталған «Казспецэкспорт» РМК-ның бас директоры Арман Рамазановқа үкім шыққанын хабарлады.
Істі Астана қаласының мамандандырылған ауданаралық қылмыстық істер жөніндегі соты қараған.
Істің мән-жайы
2023 жылы Қаржылық мониторинг агенттігі «Қазспецэкспорт» РМК-ның лауазымды тұлғалары мен теріс пиғылды жеткізушілерді ұстаған. Оларға әскери мақсаттағы өнімдерді сатып алуға бөлінген бюджет қаражатын жымқырды және сыбайлас жемқорлық деректері бойынша айып тағылған.
Мемлекетке келтірілген залал 1,6 млрд теңгеден асқан.
«Сот үкімімен «Қазспецэкспорт» РМК бас директоры Рамазанов А.К. 11 жылға бас бостандығынан айырылды, ал кәсіпорынның департамент директоры Кудабаев А.Т. – 10 жылға сотталды. Қалған 9 айыпталушы да әртүрлі мерзімге бас бостандығынан айырылды», – делінген агенттік хабарламасында.
Сонымен қатар, сот мемлекет пайдасына 1,6 млрд теңге көлеміндегі азаматтық талап-арызды қанағаттандырып, жалпы құны 607 млн теңге болатын мүлікті тәркілеген.
Үкім заңды күшіне енген жоқ.
