Қытайлық компания Алматыда қоқыс өңдеп, электр қуатын өндіретіп зауыт салады

Алматыда елдегі алғашқы энергетикалық қалдықтарды кәдеге жарату зауыты салынады. Бұған Экология және табиғи ресурстар министрлігі мен қытайлық инвестордың заңды өкілі «Junxin Environmental Protection (Almaty)» ЖШС арасындағы келісім аясында қол жеткен.

Зауыт тәулігіне 60 МВт электр энергиясын өндіріп, кемінде 1600 тонна қалдықты өңдеуге қауқарлы, ал инвестицияның жалпы көлемі 145 млрд теңге.

«Жобаны іске асыру кезінде шығарындылар бойынша еуропалық стандарттарға сәйкес келетін қалдықтарды энергетикалық кәдеге жарату жөніндегі озық технология пайдаланылмақ, сондай-ақ қоршаған ортаға эмиссиялар мониторингінің автоматтандырылған жүйесін орнату көзделген. Құрылыс кезеңінде кемінде 700 уақытша жұмыс орнын және жергілікті кадрларды тұрақты оқытып, ҚХР-ға іссапарға бар мүмкіндігімен кемінде 120 тұрақты жұмыс орнын құру жоспарлануда», – делінген ақпараттық хабарламада.

Инвестор кім

Экология және табиғи ресурстар министрлігі инвестор «Hunan Junxin Environmental Protection» қатты тұрмыстық қалдықтарды, соның ішінде термиялық өңдеу, электр энергиясын өндіру және ресурстарды қайта пайдалану саласындағы экологиялық қауіпсіз шешімдерге маманданған қытайлық жеке компания екенін айтады.

.Ол 2011 жылы құрылған. Компания операциялық тиімділікті оңтайландыруға және қоршаған ортаға әсерді барынша азайтуға ұмтыла отырып, озық технологиялар мен басқарушылық тәсілдерді белсенді түрде енгізумен шұғылданады.

Компания 2024 жылы Қытайда 3,2 млн. тонна тұрмыстық қалдықтарды қайта өңдеп, 1,473 млрд. кВт. сағ электр энергиясын өндірген.

Бұған дейін, қытайлық компания Алматыда тетрапакет зауытын салатынын хабарлағанбыз.