Президенттің жеті жылға бір рет қана сайлануы маңызды саяси бетбұрыс – Тоқаев
Президент Қ.Тоқаев ел Конституциясының 30 жылдығына арналған конференцияда сөйлеген сөзінде Ата заңға енгізілген өзгерістер туралы айтты.
Тоқаев 2022 жылы жүргізілген реформаны Қазақстанның конституциялық құрылымы тарихындағы ең мазмұндысы ретінде сипаттап, оған сол кезеңдегі өте күрделі саяси жағдай себеп болғанын атап өтті.
«Осы шешімнің арқасында бүгін Конституцияның 30 жылдық мерейтойын атап өтіп отырмыз. Дегенмен жаңа саяси жағдайға, қоғамды жан-жақты жаңғырту міндеттеріне сай келмейтін Конституциядағы ережелер референдум арқылы жойылды. Сондықтан нақты реформаның нәтижесінде Конституция баптарының үштен бірі жаңартылды. Бұл – конституциялық реформа ауқымының айқын көрсеткіші. Көп жылдан бері қоғамның көкейінде жүрген Әділдік, Ашықтық, Есептілік, Жауапкершілік қағидаттары Ата заңда көрініс тапты. Азаматтардың Конституцияға сенімі нығая түсті. Референдум өткізудегі басты мақсат осы болатын», – деді ол.
Тоқаев елдің саяси жүйесінде «Күшті Президент – ықпалды Парламент – есеп беретін Үкімет» қағидаты орныққанын айтып, бұл билікте өзара тиімді байланыс пен тепе-теңдікті сақтауға мүмкіндік бергеніне назар аударды.
«Президенттің жеті жылға бір рет қана сайлануы ел тарихындағы аса маңызды саяси-құқықтық бетбұрыс деп айтуға толық негіз бар. Себебі мұндай жағдай Қазақстанда бұрын-соңды болған емес. Осылайша, елімізде биліктің бірегей үлгісі пайда болды, яғни, мемлекеттік басқару жүйесі жаңа қағидаға сай жұмыс істей бастады, сол арқылы мемлекеттегі саяси үдерістер әлдеқайда түсінікті, болжамды, айқын бола түсті», – деді президент.
Тоқаев президенттің жақын туыстарына билік жүйесінде лауазымды қызмет атқаруға тыйым салынғанын жеткізіп, биліктегі отбасылыққа тосқауыл қойылғанын мәлімдеді.
Бұған дейін, президент Ядролық сынақтарға қарсы халықаралық іс-қимыл күніне қатысты өзінің Х парақшасында жазба жариялап, атомдық қару сынағынан қазақ халқының көрген қасіреті көп екенін айтқан.
