Жыл басынан бері 8 миллионға жуық адам пойызбен сапарлаған

Жеті айдың қорытындысы бойынша ҚТЖ пойыздарымен 7,8 миллионнан астам жолаушы сапарға шыққан.

Ең жоғары сұранысқа ие бағыттар – Астана–Алматы, Астана–Шымкент, Алматы–Шымкент, Астана–Семей және Алматы–Семей.

Жолаушылар ағыны әсіресе жазғы және қысқы маусымдарда, сондай-ақ мереке және демалыс күндері арта түскен.

Осыған орай, 2025 жылдың жазында «Жолаушылар тасымалы» АҚ  13 қосымша маршрут ұйымдастырып, Алакөл бағытына арнайы пойыздар тағайындаған.

Олардың қатарында Астана–Достық, Алматы–Достық, Семей–Шар–Достық, Өскемен–Актогай–Достық, Қызылорда–Достық және Павлодар–Достық бағыттары бар.

Сондай-ақ сұранысы жоғары Астана–Алматы, Астана–Шымкент және Ақтөбе–Астана қатынастары қосымша күшейтілген.

Акционерлік қоғам компания паркі тұрақты түрде жаңарып жатқанын айтады. Бүгінде «Жолаушылар тасымалы» АҚ вагон паркінде 2 204 вагон бар, оның ішінде 1 060 стандартты вагон, 656 «Тальго» және 94 электр пойызы бар. Соңғы он жылда парк 50 пайызға жаңартылған. Алдағы жылдарда бұл үрдіс жалғасын тауып, 2030 жылға дейін Stadler Kazakhstan зауытынан 557 жаңа заманауи вагон жеткізіледі деп күтіліп отыр. Биыл Ұлттық тасымалдаушыға 51 Stadler Kazakhstan вагоны және ЗИКСТО зауытында шығарылған 63 отандық вагон берілмек.

Бұған дейін, ҚТЖ пойыз билеттеріне 40%-ға дейінгі жеңілдік жариялаған.