Mercedes-Benz BMW қозғалтқыштарын қолдануы мүмкін – тарихтағы алғашқы ынтымақтастық
Автокөлік әлемі Mercedes-Benz пен BMW-ны әрдайым мәңгілік қарсылас ретінде қабылдап келді. Бұл брендтер ондаған жылдар бойы технология, дизайн және бедел тұрғысынан бәсекеге түсіп, неміс премиум сегментінің эталонын қалыптастырды. Алайда заман өзгерді. Car and Driver дерегінше, Mercedes-Benz қазір BMW-дан қозғалтқыш сатып алу жөнінде келіссөздер жүргізіп жатыр. Егер мәміле жүзеге асса, Штутгарт тарихта тұңғыш рет өз көліктерінің моторын басты қарсыласына сеніп тапсырады.
Қандай мотор және қай модельдерге қойылмақ?
Сөз төрт цилиндрлі, 2,0 литрлік турбоқозғалтқыш BMW B48 жайында. Бұл агрегат сенімділігімен әлдеқашан дәлелденген: ол BMW-дің 3 және 5 сериялы модельдерінде, сондай-ақ X1 мен X3 кроссоверлерінде қолданылады.
Mercedes бұл моторды CLA және C-Class сияқты ықшам седандарға, GLA, GLB және GLC кроссоверлеріне орнатуды жоспарлап отыр. Бұдан бөлек аңызға айналған G-Wagen-нің кішірейтілген нұсқасы – «Little G» де дәл осы BMW моторымен шығуы ықтимал.
Неге дәл қазір?
Mercedes-Benz соңғы жылдары электрификацияға миллиардтаған инвестиция құйып, EQ сериясын шығарды. Алайда нарық болжамды ақтамады: әсіресе АҚШ-та EQE мен EQS сатылымдары төмендеп, кейбір дилерлер бұл үлгілерді мүлде қабылдаудан бас тартты.
Экологиялық талаптардың күшеюі
Еуропада қатаң Euro 7 стандарты күшіне енетін күн жақын. Бұл талапқа сай болу үшін Mercedes өз моторларын қайта қарастыруы тиіс. Бірақ қолданыстағы M252 агрегаты заманауи гибридтік жүйелерге бейімделмеген. Ал BMW-дің B48 моторы дайын шешім: ол plug-in гибридке оңай біріктіріледі әрі болашақ экологиялық талаптарға толық сәйкес келеді.
Жаңа моторды нөлден жасап шығару – миллиардтаған еуро мен ұзақ сынақтарға алып келеді. Mercedes үшін мұндай шығынға барғанша дайын әрі тексерілген шешімді сатып алу әлдеқайда тиімді. Ал BMW өндіріс көлемін арттырып, қосымша табыс табуға мүмкіндік алады.
«Бөтен» моторлар қайда жиналады?
Қозғалтқыштарды құрастыру Австриядағы BMW зауыты – Штайрде жоспарлануда. Дегенмен болашақта өндірісті АҚШ-та да жолға қою ықтималдығы бар. Бұл импорттық баж салығынан құтқарып, Солтүстік Америкадағы позицияны күшейтуге жол ашады.
Алдын ала болжам бойынша, BMW моторымен жабдықталған алғашқы Mercedes үлгілері 2027 жылдан ерте шықпайды. Әзірге ресми мәлімдеме жасалған жоқ, бірақ келіссөздер соңғы кезеңге жеткен. Сарапшылардың пікірінше, 2025 жылдың соңына дейін компаниялар стратегиялық серіктестік туралы хабарлауы мүмкін.
Сала үшін маңызы қандай?
Бұл оқиға неміс автопромының тарихындағы ерекше сәт болмақ. Ондаған жылдар бойы бір-бірімен қатаң бәсекеге түскен екі алып енді замана талабымен одақтасуға мәжбүр. Mercedes үшін бұл уақыт ұтып, шығынды азайту мүмкіндігі. Ал BMW үшін – зауыттарды жүктеп, қосымша табыс табу жолы. Ал тұтынушылар үшін – премиум брендтер сападан бас тартпай, сенімді әрі жанармай үнемдеуге негізделген моторлар ұсынатынының дәлелі.
Mercedes-Benz пен BMW одақ құрады деген ой кеше ғана қиял сияқты еді. Бірақ нарықтағы соңғы өзгерістер өзгеше талаптары бекітті: электромобильдер әзірге нарықты жаулап кете алмады, ал тұтынушы классикалық сенімді шешімдер күтеді.
Егер келісім жүзеге асса, бұл жай ғана мотор сатып алу емес, бүкіл сала үшін шешуші қадам болмақ. Яғни, қатаң бәсекелестердің өзі болашақ үшін күш біріктіруге мәжбүр болып отыр.
Еске сала кетсек, Оңтүстік Кореялық Hyundai Motor мен америкалық General Motors компаниясы стратегиялық әріптестік құратынын мәлімдеді. Екі автоалпауыт жаңа темір тұлпар модельдерін бірлесіп шығаруды жоспарлап отыр.
