Алматы халықаралық әуежайында жолаушы өзін жарақаттап, әжетханада суицид жасауға әрекеттенді.
Оқиға ішкі рейстер терминалында болғанын әуежайдың баспасөз қызметі хабарлады. Әлеуметтік желілерде қанға боялған әжетхана мен сынған шыны бөтелкенің суреттері тарады.
«Жағдайды әуежай қызметкерлері дер кезінде байқап, бірден медициналық қызметті шақырды. Жедел жәрдем бригадасы келгенше алғашқы медициналық көмек көрсетілді. Қазір жолаушының өміріне қауіп жоқ, дәрігерлердің бақылауында», – делінген ресми хабарламада.
Әуежай әкімшілігі әуе айлағының қалыпты режимде жұмыс істеп жатқанын атап өтті.
Айта кетейік, бұл – соңғы аптадағы екінші осындай оқиға. 25 тамызда «Т-1» терминалында ер адам өзін өртемек болған. Оқиға орнына жедел жеткен полиция мен қауіпсіздік қызметі өртті сөндіріп, ер адамға алғашқы көмек көрсеткен.
