
Алматылық «Қайрат» Чемпиондар лигасының топтық кезеңінде мадридтік «Реалға» қарсы ойнайды. Испан басылымдары Қазақстанға болатын сапарды «әлемнің шетіне бару» деп сипаттап, алматылық клубты басты сенсациялардың бірі ретінде атады.
AS газеті «Қайратты» Чемпиондар лигасы тарихындағы ең шығыста орналасқан клуб деп атап, Испаниядан Алматыға жолдың қиындығын ерекше атады:
«Бұл – Чемпиондар лигасының тарихындағы ең шығыстағы команда. Қытай шекарасына жақын орналасқан. Мұнда бару – нағыз сынақ», – деп жазды басылым.
Marca басылымы да Мадрид клубын күтіп тұрған сапарды «ең қиын саяхат» деп бағалап, «Реалдың» Қазақстанға алғаш рет баратынын еске салды.
Испанияда Анарбековті «қаһарман» деп атады
Испан БАҚ-ы алматылықтардың қақпашысы Темірлан Анарбековке ерекше тоқталды. «Селтикке» қарсы плей-офф ойынында шешуші пенальтилерді қайтара отырып, «Қайраттың» топтық кезеңге шығуына үлкен үлес қосты.
Elnacional.cat порталы:
«Алматылықтардың тарихы тіпті эпикалық сипат алды. Өйткені негізгі құрамға кірмейтін 21 жастағы қақпашы Темірлан Анарбеков шешуші серияда үш пенальти қайтарып, нағыз қаһарманға айналды», – деп жазды.
Сонымен қатар, басылымдар 17 жастағы жас талант Дастан Сатпаевты да атап өтті. Чемпиондар лигасының іріктеу кезеңінде ерекше көзге түсіп, тіпті «Челси» клубымен келісімшартқа қол қойған.
«Қайраттың» жұлдызды қарсыластары
Алматыға Чемпиондар лигасы аясында «Реалдан» бөлек, бельгиялық «Брюгге», гректің «Олимпиакосы» және кипрлік «Пафос» келеді.
Ал сырт алаңдағы ойындарда «Қайрат» одан да атақты қарсыластарға тап болады:
өткен маусым финалисі «Интер» (Италия), «Арсенал» (Англия), Криштиану Роналдуның алғашқы клубы «Спортинг» (Португалия), «Копенгаген» (Дания).
Мадридтік «Реалдың» сапында Қазақстанға әлем чемпиондары мен супержұлдыздар келуі мүмкін. Әсіресе француз шабуылшысы Килиан Мбаппе ерекше аталды.
Испан басылымдары үшін «Қайрат» – Чемпиондар лигасының тосын сыйы. «Әлемнің шетіне сапар» деп бағаланған Алматыға келу «Реал» үшін географиялық тұрғыдан да, спорттық тұрғыдан да оңай болмайтыны анық.