Тоқаев Конституцияның қабылдануына Назарбаевтың еңбегін бағалау керек екенін айтты
Президент Қасым-Жомарт Тоқаев Қазақстан Республикасы Конституциясының 30 жылдығына арналған ғылыми-практикалық конференцияда сөз сөйлеп, Ата заңның қабылдануында бұрынғы президент Нұрсұлтан Назарбаевтың еңбегіне әділ баға беру қажеттігін атап өтті.
Тоқаев өз сөзінде Ата заңның ел тарихындағы орны мен маңызына тоқталды.
Президенттің айтуынша, осыдан 30 жыл бұрын бүкілхалықтық референдумда қабылданған Конституция егемен Қазақстан үшін тарихи сәт болды.
«Шын мәнінде, Ата заңнан биік ештеңе жоқ. Конституция – мемлекеттігіміздің мызғымас тұғыры, Тәуелсіздігіміздің айнымас темірқазығы», – деді Қасым-Жомарт Тоқаев.
Қазақ халқы ежелден заңға бас иген, ар-ұяттан аттамағанын айта келе, Қасым ханның қасқа жолы, Есім ханның ескі жолы және Әз Тәукенің Жеті жарғысын дала заңдарының жарқын үлгісі ретінде атап өтті.
Тарихи жол мен алғашқы Конституциялар
Президент сөзінде қазақ зиялыларының ХХ ғасырдың басында елдің құқықтық іргетасын қалаудағы еңбегін, кеңестік кезеңде заңгерлер шоғыры қалыптасқанын айтты. 1993 жылы тәуелсіз Қазақстанның алғашқы Конституциясы қабылданып, мемлекеттің конституциялық құрылымы айқындалды. Алайда жаңа тарихи ахуалға сай келетін жаңа Ата заң қабылдау қажеттігі туындады.
Осыған байланысты арнайы кеңес құрылып, отандық және шетелдік сарапшылардың қатысуымен жобаны дайындау жұмыстары жүрді. Конституция жобасын талқылауға миллиондаған азамат атсалысып, мыңдаған ұсыныс түсті.
1995 жылғы Ата заң және реформалар
1995 жылы 30 тамызда бүкілхалықтық референдум нәтижесінде қазіргі Конституция қабылданды. Оның алғашқы жолдары – «Біз, ортақ тарихи тағдыр біріктірген Қазақстан халқы…» – елдің бірлігін айшықтап берді.
Содан бері Қазақстан әлемдік қауымдастықтың белді мүшесіне айналды. Ата заңға түрлі кезеңдерде алты рет түзету енгізілді. Алайда Президенттің айтуынша, ең маңызды өзгеріс үш жыл бұрын жасалған конституциялық реформа болды.
Осылайша, Президент Қасым-Жомарт Тоқаев Конституцияның 30 жылдығына арналған конференцияда ел тарихындағы Ата заңның маңызына, оның мемлекеттілікті нығайтудағы рөліне ерекше тоқталды. Конституция – тәуелсіз Қазақстанның басты тірегі, ал халық еркі – оның ең берік негізі екенін атап өтті.
