«Кәріз суы ағып жатыр»: Алматыдағы Есентай өзенінің суы аяқасты ластанды

Алматыдағы Есентай өзенінің суы аяқасты қоңыр түске боялды. Бұл құбылыс қала тұрғындарын алаңдатты.

Желі қолданушыларының айтуынша, 28 тамыз күні күндіз судан ештеңе байқалмаған. Бірақ кеш құрым су түсі аяқтасты өзгерген. Әлеуметтік желі қолданушылары бұл құбылысқа қатысты түрлі болжамдар айтып жатыр.

Сол пікірлердің ішінде «қандай да бір кәсіпорынның кәріз суы» болуы мүмкін деген болжам жиі айтылады. Енді бірі «тауда жаңбыр жауып, саздан лайланды» деген ойда.

Сонымен бірге желі қолданушыларының «Алматыда Ганг өзені пайда болды», «Дәретхана суын ағызып жіберген шығар», «бұл батпақты өзен емес, таудан аққан су мұндай болмауы керек», «әл-Фараби жақтағы коттедждерден келіп жатқан кәріз суы» деген пікірлерін де кездестіруге болады.

KursivMedia редакциясы Алматы қаласының Экология департаментіне хабарласып, мәселенің мән-жайын түсіндіруді сұрады. Департамент 28 тамыз күні кеште судан сынама алынғанын, қорытындысы шыққанда белгілі болатынын хабарлады.