Азаматтар электросамокатты кез-кеген жерде тастап кетсе, компаниялар айыппұл төлейді
Енді самокат жүргізушілері электросамокатты кез-кеген жерде тастап кетсе, олар арнайы тұраұтарға жеткізіліп, кикшеринг компанияларынан айыппұл өндіріледі. Бұл туралы Ішкі істер министрлігінің баспасөз қызметі хабарлады.
ІІМ Jet, Яндекс, Woosh, Bolt сынды кикшерингілік компаниялардың иелерімен кеңес өткізіп, оларға бірқатар талап қойған.
Министрлік талабына сәйкес компаниялар мынадай шаралар қабылдауы тиіс:
- полиция қызметкерлерінің қатысуымен мобильді патрульдік топтар құруы керек;
- электросамокатты пайдаланушылар жасайтын құқық бұзушылықтардың алдын алу үшін шара қабылдауы керек;
- самокаттардың ретсіз қалуына жол бермеуі керек.
Арнайы тұрақтарға жетпейінше сапарды аяқтай алмайды
Яғни, енді самокат жүргізушілері электросамокатты арнайы тұрақ орындарына қоймайынша сапар аяқталмайды және төлем жүре береді. Талапқа сәйкес самокаттар жаяу жүргіншілер аймақтарында, саябақтарда, жағалауда және бұқаралық іс-шаралар өтетін жерлерде қалдырылмауы керек. Егер самокат мұндай орындарға қалған жағдайда олар автоматты түрде бұғатталады.
Кикшерингілік сервистер енді әкімдіктермен және полициямен үйлесімді жұмыс жүргізуі керек болады.
Компаниялар қосымшаларды жетілдіріп, самокатпен жүру ережелері туралы хабарлама шығаруы керек. Ол ережеге сәйкес арнайы тұрақтардан тыс сапарды аяқтауға тыйым салынады.
Самокат тәркіленіп, айыппұл салынады
Бұл тыйым орындалмаған жағдайда қатаң шара қабылданып, самокатты дұрыс қоймаған жағдайда тәркілеу, JET, Yandex, Woosh және басқа операторлар арқылы айыппұлды автоматты түрде өндіріп алу көзделген.
«Жол қозғалысы туралы заңға енгізілген өзгерістерге екі жыл болса да, айтарлықтай ілгерілеуді көріп отырған жоқпыз. Бұзушылықтар күн сайын тіркелуде, ал кикшерингілік компаниялардың қауіпсіздік бағытындағы жұмысы әлі де күткен нәтижеге жетпей отыр. Территориялық полиция департаменттеріне ретсіз қойылған самокаттарды арнайы тұрақтарға жеткізуді тапсырдым», – деді Қайсар Сұлтанбаев.
ІІМ неге талаптарды қатайтты?
ІІМ-нің талаптарды күшейтуге самокаттармен болған жол-көлік оқиғаларының жиілеп кеткен себеп болған. Мәселен, биылғы жылы елімізде электросамокаттардың қатысуымен 213 жол-көлік оқиғасы тіркелген. Салдарынан 224 адам зардап шеккені айтылады. Сонымен бірге самокатшылардың кінәсінен 42 апат болып, 52 адам жараланған. Мұндай жағдайлардың басым бөлігі Алматы қаласында тіркелген.
Еске сала кетсек, бұған дейін самокатты жалға беретін компаниялардың жауапқа тартылатыны туралы ІІМ Әкімшілік полиция комитеті төрағасы Қайсар Сұлтанбаев айтқан болатын. Комитет басшысы қалада компаниялардың дұрыс тәртіп орнатпағанын, енді талапты қатайтып, компания жетекшілерін жауапқа тарта бастайтынын айтты.
