Мемлекет ата-аналар шоттарына 25,3 млрд теңге аударды

Мемлекет ата-аналар шоттарына мектеп формасы, аяқ қиімдері мен оқу-құралдарын сатып алуға 25,3 млрд теңге аударған.

Оқу-ағарту министрлігінің ақпаратынша, бұл қаражат «Жалпыға бірдей білім беру қоры» арқылы аударылған. Министрлік алдағы оқу жылына оқушылардың 100% қамтылғаны туралы есеп берді.

«Жаңа оқу жылының қарсаңында әлеуметтік осал санаттағы оқушылардың барлығы «Жалпыға бірдей білім беру қоры» аясында толық қамтылды. Жергілікті атқарушы органдардың деректеріне, сәйкес ата-аналардың және заңды өкілдердің есепшоттарына мектеп формасын, аяқ киім мен оқу-құралдарын сатып алуға 25,3 млрд теңге аударылды», – делінген министрліктің хабарламасында.

Ведомствоның есебінше, 500 мыңнан астам балаға қолдау көрсетіліп отыр.  Бұл көмек жетім балалар мен ата-анасының қамқорлығынсыз қалғандар, аз қамтылған отбасылардың балалары, атаулы әлеуметтік көмек алушылар, сондай-ақ өмірлік қиын жағдайға тап болған балаларға берілген.

Биыл бір балаға берілетін ең төменгі төлем мөлшері 46 228 теңге болып отыр. Ал, мәслихаттардың шешімі бойынша, кейбір облыстарда жоғары көрсеткіш белгіленген. Атап айтқанда, Алматы қаласында – 55 000 теңге, Жамбыл облысында – 53 117 теңге, Павлодар облысында – 53 663 теңге.

Министрліктің дерегінше, материалдық көмектің көлемі 2023 жылдан бері бір балаға 17 мыңнан 46 мың теңгеге дейін өскен.

Айта кететін жайт, бұдан былай педагогтар өз құзыретіне кірмейтін оқыс оқиғалар үшін айыпталмайтын болды.