Қазір нарықтағы ипотека бойынша 25% жылдық сыйақы мөлшерлеме қалыпты ма? Ипотеканы қай кезде алған дұрыс? Ұлттық банк төрағасы Тимур Сүлейменов бүгінгі жиында осы сұрақтарға жауап берді.
«Ипотека бойынша 10-15 жылға 25% ЖТСМ (жылдық тиімді сыйақы мөлшерлеме) деген өте жоғары мөлшерлеме. Бұл жерде өте үлкен артық төлем бар. Қазақстандағы қарапайым отбасының оған шамасы жете ме – үлкен сұрақ. Мұнда әлеуметтік тұрақтылық және банктің қаржылай тұрақтылығы деген сұрақ туындайды», – дейді ол.
Ол азаматтарға мүмкіндігінше мемлекеттік ипотекалық бағдарламаларды пайдалануды немесе нарық тұрақталғанша күте тұруға кеңес береді.
«Барынша мемлекеттік бағдарламаларды қолданған жақсы. Немесе базалық мөлшерлеме төмендеуін, одан кейін нарықтағы пайыздық мөлшерлеме түскенін күте тұру керек шығар. Қазіргі 22%-23% ЖТСМ деген өте «қиын» және оған дайындалып бару керек», – деді төраға журналистерге берген жауабында
Сүлейменовтың сөзінше, қазір Ұлттық банкте де жылдық сыйақы тиімді мөлшерлемені өзгерту мәселесі талқыланып жатыр.
Еске салсақ, банктер 2025 жылдың 1 қарашасына дейін ипотеканы жылдық 25 пайызбен беретін болды. Ал қарашадан бастап ЖТСМ-ді 20 пайызға дейін түсіру керек. Қаржы нарығын реттеу және дамыту агенттігі осындай шешім шығарды.
Агенттік басшысы Мадина Әбілқасымова қазір банктер ұсынып отырған жылдық тиімді сыйақы мөлшерлемесі (ЖТСМ) тым үлкен, болашақта нарықта дефолт қаупі бар деп есептейді.
Қаржыгерлер қауымдастығы тамызда жариялаған сараптамасында банктер тарапынан ипотеканы мақұлдау көрсеткіші 37%-дан 26%-ға күрт төмендеген хабарлады.
