«Қанша ашулансаңыз да, бұдан басқа баға жоқ»: Ет бағасы рекордтық деңгейге өсті
Әлемде азық-түлікке деген сұраныс көбейіп жатыр және ол қазақстандық нарыққа, бағаға әсер етпей қоймайды. Ұлттық банк төрағасы Тимур Сүлейменов ет бағасының өскенін осылай түсіндірді.
«Біз әлемдік нарықтың бір бөлшегіміз. Қазір әлемде етке, майға деген сұраныс жоғарылады, сол нарықтың бір бөлшегі ретінде оны сезіп отырмыз», – дейді ол.
Ол баяндамасында ет және өсімдік майының бағасы рекордтық деңгейге жеткенін атап өтті. Бірақ тұрғындар осы баға деңгейін қабылдауы қажет деп есептейді.
«Баға қандай – сондай. Бізде басқа ет жоқ. Нарықта еттің келісі 3500 теңгеден, одан басқасын таба алмайсыз. Ауылдан мүмкін делдалсыз әкеліп сатса, арзанырақ табуға болатын шығар. Бірақ сіз қалада тұратын қарапайым тұтынушы болсаңыз, онда баға барлық жерде бірдей дер едім. Ұрысыңыз, сізге ұнамасын, бірақ бұдан басқа баға жоқ», – деді ол.
Айта кетейік, Ұлттық банк базалық мөлшерлемені бүгін 16,5% деген деңгейде қалдырды. Оған себеп болған фактордың бірі ретінде әлемде және елде де азық-түлік бағасының үздіксіз өсіп жатқанын атап өткен.
Ауыл шаруашылығы министрлігінің мәліметінше, қазір ірі қара малдың тірідей салмақтағы көтерме бағасы келісіне 2400–3100 теңге, бөлшек саудада – 3000–3700 теңге аралығында. Ведомство мұны субсидия тоқтауымен, энергия ресурстарының қымбаттауымен түсіндірді.
