Семейде қала әкімінің сайлауы өтеді

Семейде алғаш рет қала әкімінің сайлауы өтеді. Сайлауды әзірлеу мен өткізу жөніндегі құжат қала әкімдігінің сайтында жарияланды.

Құжатқа сүйенсек, әкім сайлауына кандидаттарды ұсыну 28 тамызда басталып, 11 қыркүйек күні сағат 18:00-де аяқталады. Одан кейін үміткерлерді тіркеу кезеңі жүреді. Ол 16 қыркүйекке дейін толық бітуі тиіс. Осы уақытқа дейін үміткерлер өз мүліктері туралы декларация тапсырып, сайлау жарнасын енгізіп, барлық қажетті құжаттарын өткізуі керек.

Сайлауалды үгіт-насихат 16 қыркүйекте басталып, 11 қазанда аяқталады. Үміткерлердің сайлаушылармен кездесуі үшін әкімдік пен сайлау комиссиясы арнайы орындар дайындайды.

Сайлаушылар тізімі 26 қыркүйекте жарияланады. Ал әр тұрғын өз учаскесі мен дауыс беру уақыты туралы хабарламаны 2 қазанға дейін алады.

Дауыс беру күні – 12 қазан. Сайлау учаскелері таңғы 07:00-ден кешкі 20:00-ге дейін ашық болады. Учаскелер жабылғаннан кейін бірден дауыстарды санау басталады.
Қорытынды нәтижелер 15 қазанға дейін шығарылады, ал ресми түрде 19 қазаннан кешіктірілмей жарияланады. Сол уақытқа дейін жаңа әкім ресми түрде тіркеледі.

Қазір Семей қаласы әкімінің міндетін атқарушы – Бекжан Бапышев.