29 тамызда Ұлттық банктің Ақша-несие саясаты комитеті базалық мөлшерлемеге қатысты кезекті шешімін шығарды. Осымен төртінші рет қатарынан 16,5% деңгейінде қалдырды.
Қаржы ұйымы түсіндірмесінде жылдық инфляцияның 11,8 % деңгейінде сақталғанын атап өтеді. Ұлттық банк дерегінше, шілдеде халықтың инфляцияға қатысты болжамы 14,2%-ға дейін өскен. Қысқамерзімді болжам – құбылмалы, ал ұзақмерзімді болжамдар әлі де жоғары.
Ұлттық банк есебінше, 2025 жылы инфляция – 11-12,5%, 2026 жылы – 9,5-11,5%, 2027 жылы – 5,5-7,5% шегінде болмақ.
«Болжам жекелеген азық-түлік нарықтарында бағаның күрт өсуіне, сұраныс жағынан инфляциялық қысымның күшеюіне байланысты нақтыланды. Ұстамды қатаң ақша-кредит саясаты және жоспарланған фискалдық шоғырландыру шаралары инфляцияға тежеуші әсер ететін болады. Болжам тәуекелдері фискалдық тәртіпті сақтауға, ішкі сұраныстың күшеюіне, сыртқы инфляцияның жеделдеуіне, инфляциялық күтулердің тұрақтамауына, сондай-ақ реттелетін бағалар мен ҚҚС көтерілуінің жанама әсеріне байланысты», – деп хабарлайды реттеуші.
Ал Қазақстан экономикасының 2025 жылға арналған өсу болжамын 5,5-6,5%-ға дейін жақсартты. 2026 жылға болжам 4-5% деңгейінде сақталды.
«Мұнай секторындағы өсімнің жалғасуы және инвестициялық белсенділік 2026 жылы экономиканың өсуін қамтамасыз етеді. Жаңа болжамдарға сәйкес 2027 жылдан бастап ЖІӨ өсуінің қарқыны теңгерімділік деңгейге ұмтылады», – деп түсіндіреді Ұлттық Банк
Бірақ Ұлттық банк алдағы уақытта инфляция қарқыны баяуламаса, базалық мөлшерлемені көтеруі мүмкін екендігін ескертеді.
«Алдағы айларда инфляция қарқынының айтарлықтай баяуламауы қалыптасып отырған ақша-кредит шарттарын қатаңдатуға негіз болады, ол шарттар инфляцияның 5%-дық ортамерзімді нысанаға қарай орнықты түрде төмендеу траекториясына оралуына ықпал етеді. Осыған байланысты Ақша-кредит саясаты комитеті алдағы отырыстарда базалық мөлшерлемені көтерудің орындылығын қарастыратын болады», – деп мәлімдейді реттеуші.
Бұған дейін 11 шілдеде реттеуші базалық мөлшерлемені өзгеріссіз сақтап қалды. Ол қадамын елдегі инфляцияның әлі де жоғары екенімен, азық-түлік және қызмет бағасының өскенімен түсіндірді.
Бұған дейін Ұлттық банк төрағасы Тимур Сүлейменов базалық мөлшерлеме 2025 жылдың соңына дейін қазіргі деңгейінде қалуы әбден мүмкін деген болжамын айтқан еді. Ол ішкі және сыртқы макроэкономикалық жағдайларға байланысты деп мәлімдеген.
Шілдеде елдегі инфляция көлемі 11,8% деңгейінде қалды. Осыны ескере отырып сарапшылар да реттеуші базалық мөлшерлемені өзгеріссіз қалдырады деген болжам жасады.
