2025 жылдың жеті айындағы дерек бойынша, Ұлттық банк Ұлттық қорды басқара отырып 4,6 млрд доллар табыс тапты. Кейбір сарапшылар айтқандай инвестициялық табыс минуста дегенге келмейді. Бұл туралы Ұлттық банк төрағасы Тимур Сүлейменов айтты.
Ұлттық банктің базалық мөлшерлемені бойынша қабылданған шешімді түсіндіруге арналған жиында Сүлейменовке Ұлттық қордың кірісі бойынша сұрақ қойылды. Журналистердің сөзінше, кейбір сарапшылар инвестициялық кірісі жағынан қор шығынға батып жатыр деп есептейді.
«2025 жылдың қаңтар-шілде айындағы есебі бойынша, Ұлттық банк қорды басқара отырып 4,6 млрд доллар табыс тапты. Табыстылық тұп-тура 8%-ды құрады, бұл доллармен есептегенде. Ұлттық қорда инвестициялық кіріс бойынша ешқандай шығын жоқ, қайта үш жыл қатарынан Ұлттық қорды басқарудан жақсы инвестициялық табыс түсті», – деді төраға.
Осыған дейін 2025 жылдың алты айындағы есеп бойынша, Ұлттық қор 4,6 млрд доллар табыс тапты деп хабарланған еді. Жалпы қордың активі 66,2 млрд доллар құрайды.
