Жақын арада атаулы әлеуметтік көмекті кімге беру керектігін шенеуніктер емес, арнайы алгоритм шешуі мүмкін. Еңбек және халықты әлеуметтік қорғау министрлігі жасанды интеллект негізінде жүйені сынақтан өткізіп жатыр. Алғашқы нәтижелерге қарағанда, бұл жүйе жақсы жұмыс жасап жатыр. Бұл туралы ОКҚ брифингінде вице-министр Олжас Анафин мәлімдеді.
«Модель нақты деректер негізінде оқытылды.т Биылдың өзінде FSM Social қосымшасы арқылы 100 мың отбасының тұрмыс жағдайы тексерілді. Өтініш берушілердің көпшілігі өз үйлерінің суреттерін тіркеген, ал жүйе дәл осы суреттер арқылы отбасының көмекке қаншалықты мұқтаж екенін анықтауды үйренді. Қазірдің өзінде дәлдік деңгейі 90%-дан асты», – деді Анафин.
Айта кетейік, алгоритм өтініш берушінің мәселесін толық шешпейді, ол тек сараптама нәтижелерін жергілікті комиссияға жолдайды, ал соңғы шешімді сол комиссия қабылдайды.
Дегенмен бұл сынақ тәжірибесі мұнымен шектелмейді.
«Болашақта жасанды интеллектті медицина саласына да қолдану жоспарда бар. Мүгедектік деңгейі, ауру тарихы, дәрігерлердің қорытындысы және анкеталар негізінде анықтай алатын болады. Мұндай тәсіл бюрократияны азайтып, тексеру процесін жеделдетеді», – деп түсіндірді вице-министр.
Айта кетейік, атаулы әлеуметтік көмек алушылар үшін цифрлық азық-түлік ваучерлерін ұсынуға бағытталған пилоттық жоба жүзеге асырылып жатыр. Бастама әлеуметтік маңызы бар азық-түлік тауарларын төмендетілген бағамен сатып алу мүмкіндігін қамтамасыз ету арқылы халықтың әлеуметтік осал топтарын қолдауға бағытталған.
