Шетелде жүрген қазақстандықтар үшін ажырасу рәсімі жеңілдейді

Қазақстанда шетелдегі елшіліктерге ажырасу рәсімін жеделдетуге мүмкіндік беретін өзгерістер дайындалып жатыр. Мұндағы басты жаңашылдықтың бірі, ерлі-зайыптылардың бірінің халықаралық іздеуде жүруі қарастырылған. Бұл өзгерістер «Ашық НҚА» порталында қоғамдық талқылауға шығарылды.

Сыртқы істер министрлігі азаматтық хал актілерін тіркеу қағидаларына түзетулер жариялады. Егер жұбайлардың бірі халықаралық іздеуде үш жылдан артық уақыт жүрген болса, онда некені сот арқылы жеңіл түрде бұзу мүмкін болады. Яғни, егер адам шетелде жасырынып, сот оның іздеуде екенін растаса, неке бұзу процесі жеңілдетіледі.

Айта кетейік, бұл өзгерістер жаңа Салық кодексінің қабылдануына және «Неке (ерлі-зайыптылық) және отбасы туралы» кодекстің 238-бабына енгізілген толықтыруларға байланысты енгізіліп отыр.

Айта кетейік әлеуметтік желі қолданушылары мен кей пабликтер «16 қыркүйектен бастап ажырасу рәсімі жеңілдейді» деген ақпарат таратып жатыр. Онда енді тараптар бір жақты ажыраса алатыны, бұл сот жүйесіне түсетін жүктемені жеңілдететіні айтылады. Алайда бұл олай емес. Әңгіме «Неке және отбасы туралы» кодекске енген өзгерістен шыққан.