Қазақстандық жүргізушілер Қырғызстанда көліктерін тіркеуге тиіс болады
Биыл 1 қазаннан бастап Қырғызстанда жол қозғалысы ережелері өзгереді. Жаңа талаптар шетелдік нөмір таққан көліктерге, соның ішінде қазақстандық көлік иелеріне де тікелей қатысты болады.
Жаңа талаптар
Қырғызстанның Көлік министрлігі жол қозғалысы ережелеріне өзгерістер енгізу жобасын қоғамдық талқылауға шығарды. Жобаға сәйкес, шетелдік тіркеудегі барлық көлік құралдары елдің мемлекеттік органдарында тіркелуі керек.
Ол үшін жүргізушілерден келесідей құжаттар талап етіледі:
- көлікті тіркеу туралы куәлік,
- автокөлікті басқаруға берілген сенімхат
- ЕАЭО-ның уақытша әкелу туралы кедендік белгілері бар құжаттар.
Бұл не үшін қажет
Қырғызстан билігі бұл жаңашылдықтар ел президентінің 2024 жылғы 31 желтоқсандағы «Автокөлік құралдарын заңдастыру шаралары туралы» жарлығын іске асыруға бағытталғанын түсіндірді. Ережелер жол қозғалысы қауіпсіздігін арттыруға, сондай-ақ заңдастырылған көліктерді сату немесе елден шығару кезінде орын алуы мүмкін заңбұзушылықтардың алдын алуға көмектесуі тиіс.
Бір қызығы, егер жүйеде көліктің елге кірген күні туралы дерек болмаса, онда көлік 2024 жылғы 30 желтоқсанда Қырғызстанға кірді деп есептеледі.
Міндетті тіркеуден бөлек, жеңілдік те қарастырылған. Мәселен, заңдастырылған көлікті тек иесі ғана емес, техникалық төлқұжатта аты-жөні көрсетілмеген өзге адамдар да басқара алады.
