Шаңсорғыштан гиперкарға дейін: Dreame әлемдегі ең жылдам автокөлік шығармақшы
Көпке шаңсорғыш пен шаш кептіретін стайлерімен танымал Қытайдың Dreame Technology компаниясы үй техникасынан тысқары қадам жасап, әлемдегі ең жылдам электр гиперкарын шығаруға ниетті. Аталған бастамасы туралы өндіруші жаһанға жар салып, хабарлады. Көлік әйгілі Bugatti Veyron-ға тікелей бәсекелес болмақ. Бұл туралы CarNewsChina мен InsideEVs хабарлады.
Шаңсорғыштан гиперкарға дейін
Жобаның негізгі қозғаушы күші – компания шығаратын цифрлық мотор, ол минутына 200 000 айналымға дейін жұмыс істей алады. Бұл мотор алғаш рет Z50 Station шаңсорғышында қолданылған еді, енді сол технология болашақ гиперкардың «жүрегі» болмақ.
Dreame жобасын жүзеге асыру үшін шамамен 1000 маманнан құралған инженерлік топты жасақтап үлгерді. Компания 2027 жылға қарай алғашқы үлгіні көрсетеміз деп уәде беріп отыр.
Басты артықшылық – жасанды интеллект болмақ
Жаңа гиперкар тек жылдамдықпен ғана емес, сонымен қатар жасанды интеллект жүйесімен ерекшеленбек. Ол жүргізушінің әдеттерін, көңіл-күйін ескеріп, соған бейімделеді. Сондай-ақ, адамға ұқсас дауыс интерфейсі, «ақылды үймен» және смартфондармен толық интеграция қарастырылған.
Фантазия ма, әлде болашақ па?
Dreame-дің бастамасы автонарықта жалғыз мысал емес. Бұған дейін де тұрмыстық техника және электроника саласынан шыққан ірі ойыншылар көлік өндірісіне қадам басуға тырысқан.
Мәселен, Dyson компаниясы бірнеше жыл бұрын электромобиль жобасын қолға алған еді. Инженерлер прототип жасап үлгергенімен, жоба қаржылық тұрғыдан тиімсіз деп танылып, ақыры тоқтатылды. Бұл тәжірибе тұрмыстық техникадан автонарыққа көшу қаншалықты қиын екенін көрсеткен болатын.
Ал қытайлық Xiaomi мен Huawei басқа жолды таңдады. Екі компания да өздерінің технологиялық мүмкіндіктерін пайдаланып, смарт-автокөліктер әзірлеуге кірісті. Бүгінде Xiaomi алғашқы электр седанын таныстырса, Huawei бірқатар қытайлық автоконцерндермен серіктестікте көлік жасап жатыр.
Осы тұрғыдан алғанда, Dreame-нің гиперкар жобасы – жалпы үрдістің жалғасы. Технологиялық компаниялар үшін автокөлік енді тек транспорт емес, жоғары технологиялы платформа ретінде қарастырылуда. Сондықтан шаңсорғыш моторынан басталған тәжірибе, бір күні жолға шығатын болашақ көліктің жүрегіне айналуы ғажап емес.
Dreame-нің бастамасы – батыл қадам болғанымен, тәуекелі көп іс. Бірақ егер жоспар жүзеге асса, компания тұрмыстық техникадан автокөлік өндірісіне сәтті өткен алғашқы брендтердің біріне айналуы мүмкін. Бұл қадам Bugatti секілді дәстүрлі өндірушілер арасында бәсеке тудырып, электр гиперкар нарығын түбегейлі өзгертпек.
