Америкалық Blackrock компаниясы Freedom Holding-тің екінші ірі акционері атанды
Әлемдегі ең ірі Blackrock инвестициялық компаниясы Тимур Турлов иелік ететін Freedom Holding-ке 89 млн доллар көлемінде инвестиция құйды. Осылайша, америкалық алпауыт қазақстандық кәсіпкерге тиесілі компанияның екінші ірі акционері атанды.
Әлемдегі ең ірі басқарушы компания саналатын BlackRock соңғы есептік кезеңде Freedom Holding Corp.-тағы үлесін 0,85%-ға дейін ұлғайтқан. Bloomberg басылымының мәліметінше, компания шамамен 89 млн доллар көлемінде инвестиция құйған. Солайша BlackRock бір тоқсан ішінде позициясын 443 965 акцияға өсірген. (Солайша жалпы акцияларының саны 520 565-ке жеткен)
BlackRock-пен қатар холдингтің ірі акционерлері қатарында жаһандық инвестициялық алпауыттар да бар. Оның бірі корпорацияға 31,9 миллион доллар инвестиция салған State Street Corp. Аталмыш компанияның акциясы 138 017-ге дейін өсіп, жалпы саны 186 779-ға жеткен. Сонымен бірге Grace Partners of DuPage L.P. 31,5 млн доллар инвестиция құйса, Geode Capital Management 27,3 млн доллар құйған.
BlackRock, Inc. – институционалдық және бөлшек клиенттер үшін инвестициялар мен тәуекелдерді басқаруға маманданған және технологиялық шешімдер ұсынатын әлемдегі ең ірі америкалық трансұлттық инвестициялық компания саналады.
Негізі 1988 жылы қаланған бұл компанияның негізгі кеңсесі Нью-Йоркте орналасқан. 2025 жылғы мәліметтерге сәйкес, компания 12,5 трлн доллар активтерді басқарады. BlackRock-тің ETF-қорларында iShares және Aladdin сынды танымал бағдарламалық құралдары бар.
Ал Freedom Holding-тің құны 7,2 млрд доллар болатын 69,26% акцияларына Тимур Турлов иелік етеді.
2025 фискалдық жылының қорытындысы бойынша (2024 жылдың сәуірінен 2025 жылдың наурызына дейін) Freedom Holding Corp. компаниясының табысы 2,1 млрд долларды құрады. Бұл өткен жылмен салыстырғанда 23%-ға жоғары. Холдингтің таза пайдасы 84,5млн доллар болды. Ал активтері 8,3 млрд-тан 9,9 млрд долларға дейін өсіп, жылдық өсім көлемі 19%-ды құрады.
Қазақстанда холдинг Freedom Broker және Freedom Finance Global брендтері арқылы брокерлік қызметтер көрсетеді. Ел аумағында Freedom Holding Corp.-тың басқа да еншілес ұйымдары жұмыс істейді, олардың қатарына «Фридом Банк», Freedom Insurance және Freedom Life сақтандыру компаниялары және т.б. кіреді.
