Жетісу облысының Панфилов ауданына қарасты Талды ауылында Конституция күні қарсаңында 300 орындық жаңа мектеп ашылды. Бұл туралы Жетісу облысы әкімінің баспасөз қызметі хабарлады.
«Бұл нысан Білім беру инфрақұрылымын қолдау қорының қаражаты есебінен салынды», – делінген баспасөз хабарламасында.
Аталмыш мектепте шамамен 400 бала білім алады. Жаңа мектеп қажетті құралдармен қамтамасыз етілген. Атап айтқанда, пәндік кабинеттер, IT-сыныптар, спорт және акт залдары, кітапхана мен зертханалар бар.
Сонымен бірге мектеп пен ауылдың денсаулық сақтау, ауылшаруашылығы салаларына білікті мамандарды тарту үшін ауылда меценаттар көмегімен 19 жаңа үй салынған.
Әкімдік мәліметінше, 2022-2025 жылдар аралығында Жетісу облысында 276 әлеуметтік нысан бой көтерген. Оның 41-і – білім ошақтары. Бұдан бөлек, үш жылда өңірде 41 мектеп жаңартылып, 6390 орынға арналған 19 мектеп салынған. Ал 22 мектепке күрделі жөндеу жүргізілген. Ал 2025 жылдың аяғына дейін 10 мектептің құрылысы аяқталмақшы.
Айта кетсек, елдің әр өңірінде жемқорлардан қайтарылған қаражатқа жаңа мектептер салынып жатыр. Жалпы елде 100 мың оқушыға лайықталған 89 мектеп салу көзделген. Бүгінде оның 61-і пайдалануға берілген. Ал 2025 жылы 28 мектеп салынатыны айтылған.
