Абай облысында жаңа су қоймасы салынады

Абай облысында 2026 жылы жаңа су қоймасы салынады. Бұл туралы Су ресурстары және ирригация министрлігінің баспасөз қызметі хабарлады.

Су қоймасы Абай облысының Ақсуат ауданындағы Қарғыба өзенінің бойында салынады. Қазіргі таңда қойманың жобалау-сметалық құжаты әзірленіп жатыр.

«Қазсушар» РМК-ның жергілікті филиалы Ақсуат ауданы әкімдігінің қызметкерлерімен бірігіп арнайы комиссия құрып, құрылыс жүретін жерлерді тексерген.

«Тексеру барысында тараптар жобаны жан-жақты талқылап, өз ұсыныстарын ортаға салды. Аудан әкімдігімен бірлесіп ішкі каналдар да қаралды. Жергілікті атқарушы органдар олардың реконструкциясына қатысты жобалау-сметалық құжатты әзірлеумен айналысады. Жаңа су қоймасы мен магистральді каналдар аудандағы ирригациялық жүйелердің толыққанды әрі тиімді жұмысын қамтамасыз етеді», – деді Абай облысындағы «Қазсушар» РМК филиалының директоры Жарқынбек Байсабыров.