Тоқаев пен Си Цзиньпин келіссөз жүргізді

Президент Қасым-Жомарт Тоқаев ҚХР төрағасы Си Цзиньпинмен келіссөз жүргізді. Бұл туралы Ақорда хабарлады.

Кездесу барысында Тоқаев тарихи шаһар Тяньцзиньде қонақжайлық танытқан үшін Қытай елінің басшысының алғысын жеткізген.

«Біз Сіздің еліңіздің осы ұйымға төрағалық етуін толық қолдаймыз. Ұйымның күн тәртібінде тұрған мәселелерді талқылау жұмысына белсене атсалысып жатырмыз. Сондай-ақ Сізді Екінші дүниежүзілік соғыстағы Жеңіс пен Қытайдың жапон басқыншылығына қарсы соғыстағы жеңісінің 80 жылдығымен құттықтаймын. Сіздің еліңіз фашизмді жеңуге өлшеусіз үлес қосты. Қытай халқы соғыс жылдарында нағыз батылдық, шынайы отаншылдық, қайтпас қайсарлықтың озық үлгісін көрсетті. Мұны бәрі жақсы біледі және жоғары бағалайды», – деді президент.

Сонымен бірге Тоқаев Си Цзиньпиннің тікелей қолдауымен қазақ-қытай арасындағы ынтымақтастық арта түскенін атап өткен. Соның дәлелі ретінде екі ел арасында тауар айналымының 44 млрд долларға жеткені айтылған.

«Осы оң үрдіс биыл да сақталып отыр. Қытай – Қазақстанның ең ірі сауда серіктесі. Ортақ ірі жобаларымыз жүзеге асырылып жатыр. Мен осы сапарымның аясында Қазақ-қытай іскерлік кеңесінің отырысына қатысамын. Қытайдың бірқатар ірі компаниясының басшыларымен кездесемін. Биыл Қазақстанда Қытай туризмі жылы екенін ерекше көңілмен атап өткім келеді. Екі елдің мәдени-гуманитарлық ықпалдастығын нығайтуға қолайлы жағдай жасалған. Соның жарқын мысалы – Қазақстанда «Лу Бань зертханасының» екінші және үшінші филиалдары ашылатын болды. Бейжің қаласында Қазақстанның мәдениет орталығын ашу туралы шешіміңіз үшін Сізге зор алғыс айтамын», – деді президент.

Еске сала кетсек, Тоқаев Шанхай ынтымақтастық ұйымының саммитіне қатысу үшін Қытайға барған болатын.