2025 жылдың жазы жарқын сәттерге толы өтті деп толық сеніммен айта аламыз. Олай дейтініміз, есте қалатын жайт көп болды. JLO келіп әсем әнімен тербетті. Қаншама қазақстандық танымал персона шаңырақ көтерді. Kursiv Media тілшісі биыл жазда ең көп талқыланған, айрықша өткен үйлену және ұзату тойларына шолу жасап шықты.
Әділет Майғазиев пен Әдия
Ел ішінде қатты талқыланған тойды Сәкен Майғазиев ұйымдастырды. «МұзАрттық» әнші ұлы Әділет шаңырақ көтеріп, соның құрметіне ұлан-асыр той жасады. Әділет ақтаулық Әдия есімді қызға үйленді. Той болардан бұрын Сәкен парақшасына сілтеме қалдырып, тойдың ақылы трансляциясы туралы жариялаған еді. Яғни тойға онлайн-қонақ болғысы келген адам 1380 теңге төлеп, қарай алады. Тойды тікелей эфирде бұған дейін көрсеткендер болғанымен, ақылы қылып қойғаны болмаған соң, көпшіліктің талқысына түскені — заңдылық.
Алматыдағы Royal Tulip мейрамханасында өткен салтанатты кешті 5800-дан аса адам онлайн тамашалады. Іс-шараны белгілі продюсер Жан Мұқановтың агенттігі ұйымдастырған. Жалпы алғанда тойға 800-ден астам қонақ келген. Тойдың трансляциясын белгілі тележүргізуші Анна Данченко мен асаба Әзімбек Байлин жүргізді. Бұл тойдың тағы бір ерекшелігі — мобилографтардың болмағаны. Яғни тойды тек тікелей эфирден көруге мүмкіндік болды. Трансляция кәдімгі шоу-концерттер секілді ұйымдастырылып, ол жерге қонақтар шақырылып, сол жерде сұхбат алынды.
Көптің көкейінде болған «Сәкен сонда тойдан ақша таппақшы ма?» деген сауалына Анна Данченко былай деді: «Сілтеме ақылы болады деп айтқан болатынмын. Дұрыс түсініңіздер, мұны мен жасап жатқан жоқпын, ұйымдастырушылар да жасап жатқан жоқ. Тікелей эфирде тойды көрсету үшін арнайы рұқсат алу керек, оның ақшасы бар. Одан кейін серверге тапсырыс беру керек. Оның сомасы үлкен емес, 1000 теңгеден асады. Қымбат емес. Ол ақша Сәкен ағаның қалтасына түспейді. Отбасы да жарата алмайды. Ол ақшаны ПТС камерамен түсіретін ұжымға төленетенін және серверге берілетінін айтты», – дейді Анна Данченко.
Артур Асқарұлы мен Замира Саидова
Жұптың үйлену тойы 13 шілдеде Алматыдағы Koktobe Hall мейрамханасында өтті. Бұл салтанатты іс-шарада барлығы егжей-тегжейіне дейін ойластырылғанын байқадық. Қонақтарды қарсы алатын зонадан бастап, суретке түсуге арналған аймақ, концерт және шоу-бағдарлама — бәрі болды. Ол аздай, мұның бәріне жеке-жеке локация дайындалған. Сондықтан бәрі түсінікті әрі жүйелі жасалғаны көрініп тұрды. Тағы бір айта кететіні, заманауи жастар тек еуропалық стильді емес, ұлттық колоритті де сақтауға тырысқан. Осылайша әдемі үйлесім тауыпты. Келген қонақтарға локация ұнағаны сонша сол күні тойдан салынған фото-видео көп болды. Әсіресе, панорама көріністер, классикалық итальялық стильдегі интерьермен безендірілген банкет, ашық аспан астындағы шоу-бағдарлама «мына сәтті қалайша Isntagram-ға салмайсың» деп менмұндалап тұрды.
Шоу һәм шағын концерт болды дегеніміз де бекер емес. Себебі бұл кешке қазақ эстрасының ең-ең деген аңыз тұлғалары мен хит-мейкерлері жиналды. Мысалы Роза Рымбаева, «Жұбайлар жырының» авторлары «Дос-Мұқасан» тобы, «МұзАрт» тобының жұбайларға жылы лебізін арнап, ән шырқағанының өзі — биік деңгейден хабар береді. Тойда Артурдың анасы, танымал тележүргізуші, журналист Гүлмира Дайрабай да әнмен шашу шашты. Әлбетте, той-томалақ болған соң диджей, лайв-бенд, визуал перформанстың бәрі болады. Артудың өзі де блогер болғандықтан, оның басты «әріптестерінің» де басты бөлігі инфлюенсерлерден құралатыны анық. Нақты қанша жұлдыз келгенін санау мүмкін емес. Дегенмен Арман Юсупов пен Карина Оксукпаева, Жеңіс Омаров (Zheka Fatbelly), Ратбек, Адина Топашева, Мадина Мамадалиева (Мадлен), Әділ мен Сәния Тасболатовтар, Біржан Әшім, Ұлықбек Шәріпов, Айым Сейтметова мен Талғат Итаев және т.б қатысты. Ал той тізгіні Марат Оралғазин мен Еркебұлан Мырзабекте болды.
Тойдың ең маңызды бөлігі — беташар. Жаңа түскен келіннің салған сәлеміне әркім әрқалай ақша салады. Артурдың тойындағы қатты талқыған түскен сәт те осы беташар болды десек, қателеспейміз. Блогер «Біздің қонақтар мықты» деп видео жариялады. Сол жердегі үзіндіден кімнің қанша бергенін байқап қалдық. Мысалы футболшы Дидар Сыдықбек бір миллион теңгені шатырлатып салды. Сондай-ақ, Артурдың анасы — 500 мың теңге, Ұлықбек Шәріпов — 500 мың теңге, Жека Фатбелли — 300 мың теңге салып жатты. Одан бөлек те туыстары мен достарының 100-200 мыңдап салғаны көрініп тұрды. Үйлену тойынан үзінділерді Артур белсенді салып отырды. Кәсіби командасы бар блогер бұл жағынан бәрін реттеп, ұйымдастырып қойған. Парақшасында да шағын той болып жатты. Оған қоса, сол кештен тегін трансляция жүрді. Сол күні тікелей эфирден тойды 50 мыңдай адам көрген.
Ратбек және Айша
Төрт жыл бойы тым-тырыс болып қалған белгілі блогер, вайнер Ратбек Баянов та жазда отау тікті. Үйлену тойы Артурдың тойынан бір аптадан кейін өтті. Бұл кешке де блогер, инфлюенсер көп жиналды. Әсіресе, біраз жыл бойы көрінбей кеткен Ратбектің тойда «кәмбек» туралы айтқаны көпшілікке ерекше ұнады. Той суретін салған ол «4 жыл, 1 ай, 1 күн дегенде салған алғашқы жазбам. Жазылып алыңыздаршы, өтініш. Дәл бір айдан кейін вайн саламын» деп жазып қалдырған. Оған қоса блогер Ahmad Helmi тойдан үзінді салды. Ол жерде Ратбек тойшыл қауымның алдына шығып, 20 тамыз, кешкі сағат жетіде вайн салып, блогын қайта қолға алатынына уәде берген. Уәдесінде тұрды ма деп парақшасын тексеріп шықтық. Сөзінде тұрып Ратбек жаңа видео салды. Ол жерде вайнер бес жылға жуық уақыт бойы қайда жоғалып кеткенін айтып, вайн түсіруге ниетті екенін жариялаған. Осылайша ол «вайнер болып емес, Ратбек блогер» болып оралдым деп әзілдеп арамызға қайта оралды. Парақшасы бұғатталып қалғаннан кейін бәрін басынан бастап жатқан блогердің мақсаты — 2 миллион оқырман жинау. Әзірге оны 130 мыңнан астам адам оқиды. Тойымен таңғалдырған оған енді сол статистиканы ұстап тұру үшін күнделікті белсенді болып, парақша жүргізу керек болып тұр.
Ермахан Аймахан мен Раушан Құдайберген
Белгілі әнші Димаш Құдайбергеннің қарындасы — Раушан Құдайберген 1 тамызда ұзатылды. Раушан — танымал әнші жұп Қанат пен Света Айтбаевтардың қызы. Ұзату өте қазақы, дәстүр сақталған, ерекше форматта өтті. Әсіресе, әже тәрбиесін көрген қалыңдықтың өзін-өзі ұстауы көпшілікке айрықша ұнады. Қыз Жібектің образынан шабыт алып тігілген көйлегі көрген көзді сүйсіндірді. Раушанның ұзатуға киген киіміне жалпы алғанда 12 миллион теңгеге жуық қаражат кеткен. Көйлек, кәжекей, үкілі тақия, қамзол қазақстандық дизайнер Азамат Арғынбаевтың туындысы. Ал сәукелесі мен әшекей бұйымдары Эльмира Ибрагимованың шебер қолынан шыққан. Одан бөлек, Раушан шекелік, шаштарақ, бесбілезік, өңіржиек, сырға, шашбау, үзбелі белдік те тақты.
Ұзату кешінің ең есте қалған сәттерінің бірі ретінде бауырлары — Димаш пен Мансұрдың Раушанға арнап ән салған кезі. Димаш Құдайберген өз парақшасына ұзатудан видео салып, ақжарма тілегін арнады: «Жол мұраты — жету, қыз мұраты – кету» дейді қазақ халқы. Оны ұғынсақ та, бауыр етінен жұлып алғандай етіп қарындасты өзге жұртқа аттандыру кімге болса да оңай емес екен. Дегенмен теңін тауып, ата-анасының, туған-туыстарының ризашылығымен кетіп бара жатқаны көңілге қуаныш ұялатады. Қолымыздан ұшып бара жатқан қызымыздың қонған жері құтты болсын! Барған еліне тастай батып, судай сіңсін! Құдай қосқан жарына бақ болып қонсын, қосағымен қоса ағарсын! Раушантайыма Мансұр ініммен бірге, «Қарлығашым, ұя салғанда…» атты әнімді ақжүрек тілегіміз ретінде қабыл алғайсың! Жүректегі сағыныш пен қимастықты осы әннің өн-бойынан көрсеткіміз келді. Бақытты бол, қарлығашым менің! Көкесінің жүрегі», – деп жазды әнші.
