Мұғалімдердің жалақысы 2 есе өсті – министрлік
Мұғалімдердің жалақысы соңғы жылдары 2 есеге артты. Мектепке дейінгі білім беру ұйымдарының ұстаздарының айлығы тағы 30%-ға өскен.
Бұл туралы Оқу-ағарту министрлігінің 2024-2025 оқу жылының қорытындысы мен жаңа 2025–2026 оқу жылына қойылған міндеттерінде көрсетілді.
Қосымша үстемеақылар
Аттестация нәтижесі бойынша біліктілік санаты үшін қосымша үстемақылар төленеді. Айталық, педагог-шебер – 50%, педагог-зерттеуші – 40%, педагог-эксперт – 35%, педагог-модератор – 30%. Мектептер қағазбастылықтан арылып жатыр. Апталық оқу жүктемесі 18 сағаттан 16 сағатқа дейін азайған.
Қомақты сыйақы
Сонымен қатар, халықаралық пәндік олимпиадалар жеңімпаздарын дайындаған ұстаздарға қомақты сыйақы беріледі. «Үздік педагог» байқауының жеңімпаздарына 1000 АЕК сыйақы тағайындалады. Қазір кезде үздік ұстаздардың саны 800-ден асқан.
Құрметті атақ
«Қазақстанның еңбек сіңірген ұстазы» құрметті атағы қайта жаңғыртылды. Оған да 1000 АЕК көлемінде сыйақы беріледі. Ел тарихында алғаш рет 3 педагогке «Еңбек Ері» атағы беріліп отыр. Олар – Алма Шүкіжанова (Абай облысы), Гүлжанар Нұрпейісова (Алматы қ.), Эльмара Траисова (БҚО).
Мамандыққа қызығушылық артқан
«Президенттің қолдауымен ұстаздық мамандыққа қызығушылық артып келеді. Соңғы 5 жылда жыл сайын шамамен 50 мың түлек тәмамдайды. Техникалық және кәсіптік білім беру ұйымдарында тағы 20 мың болашақ ұстаз бітіреді. Бұл педагог кадрлар жетіспеушілігін жоюға мүмкіндік берді», – делінген ақпаратта.
Бүгінде елімізде 412 мың педагог еңбек етіп жатыр. Олардың 73%-ы – жоғары біліктілік санатында. Педагогтердің кәсіби біліктілігін арттыру курстарының саны 2 есеге артқан.
Министр Ғани Бейсембаев өз құзыретіне кірмейтін оқыс оқиғалар үшін мұғалімдердің енді айыпталмайтынын мәлімдеген еді.
