Toyota Camry XV80 бұрынғы буыннан әлдеқайда артық – танымал автоблогер (видео)
Танымал автоблогер әрі интернет-сериал жұлдызы Артём Карокозян көпшілікке «Каха» есімімен белгілі. Ол Toyota Camry-дің артықшылығын атады.
Ол жаңа Toyota Camry XV80 үлгісінің басты артықшылықтарын атап өтті. Көп блогерлер бұл седанды бұрынғы «жетпісінші буынмен» (XV70) салыстырып, үлкен айырмашылық жоқ дейді. Бірақ Карокозян бұл пікірмен келіспейді.
Жаңа Camry: гибридті қозғалтқыштар және үнемділік
Каха пікірінше, Camry XV80-нің басты жетістігі — гибридті моторлар. Оның айтуынша, 2.0 литрлік гибрид бұрынғы 2.5 литрлік бензин қозғалтқышынан да шапшаң.
Ал 2.5 литрлік гибрид тіпті бұрынғы 3.5 литрлік мотордан да жылдам. Сондай-ақ, танымал автоблогер отын шығыны да азайғанын дәйек етіп келтіреді.
2.0 гибрид қалада – шамамен 7 л/100 шақырым шығын жұмсайды. Бұрынғы бензинді нұсқаларының көрсеткіші –12 л/100 шақырым.
Қорап, басқару және жаңа технологиялар
Көп жүргізуші вариаторлық қорапты сенімсіз санайды. Бірақ Каха түсіндіруінше, XV80-де вариатор емес, планетарлық беріліс қорабы орнатылған. Ол әлдеқайда сенімді әрі «ерекше бірқалыпты» жұмыс істейді.
Басқару да жақсарған. Жолда өзін жақсы ұстайды. Бұған 19 дюймдік дискілер ықпал етіп отыр.
Жаңа функцияларға келсек, шынайы жұмыс істейтін сымсыз зарядтағыш, артқы орындықтан алдыңғы жолаушы орындығын басқару мүмкіндігі бар.
Шыны төбе және салон температурасы
Толық әйнекті төбе көп жүргізушілердің алаңдаушылығын тудырған. Алайда танымал автоблогер Каха термалды әйнек қолданылғанын айтып, тәжірибе жасап көрген. Нәтижесінде, салон ішіндегі температура басқа көліктерден көп айырмашылық көрсетпеген.
Интерьер мен сыртқы түрі
Интерьер мен сыртқы түрі даулы болса да, сәтті шешім болып шыққан. Каханың айтуынша, XV80 — бұл жай ғана «бет-әлпеті өзгерген Camry» емес. Ол – жаңа қозғалтқыштары, жақсартылған аспасы, жаңартылған қорабы бар нағыз жаңа буын көлігі.
Салондағы толық сенсорлы басқару кейбіреулер үшін ыңғайсыз болуы мүмкін. Бірақ танымал автоблогер мұны үлкен кемшілік деп есептемейді. Жалпы алғанда, Toyota ыңғайлы, заманауи және бәсекеге қабілетті көлік жасаған.
Мұның алдында Toyota Land Cruiser Hybrid 48V – жапонның аңызға айналған көлігі жаңа гибридті жүйеге ие болғаны туралы хабарлаған едік.
