Қазақ эстрадасында жыл басынан бері сәбилі болғандар аз емес. Соның ішінде көпбалалы отбасының саны да көбейді. Сүйінші хабарды кейде жұлдыздардың өзі хабарласа, енді бірі үнсіз қалып, тек жақындарының сөзінен ғана белгілі болған кез де көп болды. Kursiv Media тілшісі 2025 жылы қазақстандық жұлдыздардың ішінде кімдердің ата-ана атанғанына шолу жасап шықты.
Ғазрет Ержанов пен Кәмшат Жолдыбаева
Отандық шоу-бизнестің белгілі жұлдызы, «КешYOU» тобының экс-мүшесі Кәмшат Жолдыбаева биыл қыста алғаш рет ана атанды. Бұл қуанышты жаңалықты танымал тележүргізуші Анна Данченко Instagram парақшасына салып, бөліскен еді. «Қуанышты жаңалық! Сүйікті әнші қыздарыңыз Кәмшат Жолдыбаева қызды болды! Бауы берік болсын! Денсаулығы мықты болып өссін!» – деп жазды тележүргізуші. Сүйінші хабарды Анна бөліскенімен, ата-ана атанған жұп бұл туралы ештеңе салмады.
Содан кейін Данченко «Кеше осы сүйінші жаңалықты бөліскен едім. Барлық сайт, оқырман шулап кетті ғой. Ақпарат ресми түрде шыққан соң құттықтадым. Жекеге неше түрлі хаттар келді. Кәмшат 2-3 ай бұрын босанды. Ата-енесімен тұрады. Тіпті кішкентай қызының суреттерін жіберіп жатқандар бар. Дұрыс қой енді, отбасы болған соң Алланың қалауымен балалы болды, өз өмірлері. Өздері қаласа, кейінірек бөпелерін де көрсетер. Олар тыныш өмірді қалады. Бақытты болсын!» – деп жазды журналист.
Кәмшат біраз уақыт бойы желіде белсенді болмай кеткен еді. Оған қоса, жеке өмірі туралы да онша айта бермейді. Тіпті жұрт арасында отбасылық өміріне қатысты түрлі сыбыс та жүрді. Әйтсе де, бәрі дұрыс екенін әнші күйеуімен бірге түскен салып, білдірді. Қазір ол Piya деген брендтпен күтімге арналған косметика шығарып жатыр. Естеріңізге сала кетсек, Жолдыбаеваның ұзатылғаны туралы жаңалық 2023 жылдың наурызында тараған еді. Жолдасы да — өнер адамы. Танымал жас актер Ғазрет Ержановпен шаңырақ көтерді.
Тәуекел Мүсілім
Танымал актер, тележүргізуші Тәуекел Мүсілімнің үшінші ұлы осы наурызда өмірге келді. Баланы перзентханадан шығарып алу рәсіміне актердің туыстары мен жақындары барған. Тәуекелдің айтуынша, олар үшінші баланы қыз болады деп ойлаған. Бірақ атұстар өмірге келген. Махаббат екеуінің Айтөре, Әмір және Зейін деген ұлдары бар.
Перзентханадан шығарып алған сәтте берген сұхбатында актер «Кез-келген ата-анаға баласының бақытты болғаны маңызды. Қандай мамандық таңдарын көре жатармыз. Бірінші қалауым футболшы болса деген ойым бар. Ұнатып жатса, кәсіби деңгейге жетуге қолдау білдіремін. Егер футболды ұнатпаса — өз таңдауы. Қай жаққа икемі болады, соған бағыттаймыз» деп жауап берген еді.
Әйеліне деген қамқорлығын үнемі көрсетіп жүретін Тәуекел бұл жолы да «Махаббатқа ризамын. Оны одан сайын қатты жақсы көріп кеттім. Мүмкіндігінше қымбат сыйлық беруге тырысамын» деген еді.
Аян Өтепберген
Белгілі актер Аян Өтепберген сәуірде әке атанды. Сүйінші хабарды актер парақшасындағы stories-ке бөлісті.
«Сүйінші! Жаратушының қалауымен кесте тігер арудың әкесі атандым», – деп жазды ол.
Аян жеке парақшасында отбасылық өмірі туралы онша көп айта бермейді. Бірақ 2023 жылдың желтоқсан айында ақтөбелік ару, стилист әрі арт-директор Аружан есімді аруға үйленгені белгілі. Бұл жаңалықты да өзі салмаса да, тойдан тобықтай деп барған қонақтар жариялаған болатын.
Бүркіт пен Аиша
Қазақстандық әнші, Бүркіт лақапатымен танымал Айбек Жансейітов мамырда көпбалалы әке атанды. Әйелі Аиша төртінші сәбиін аман-есен өмірге әкелді. Бүркіт Istagram парақшасына оқырманнан сүйінші сұрап, осындай жаңалық барын айтқан еді.
Перзентханадан шығарып алған сәттен үзінді салған ол: «Ал, қазақ елі, сүйінші! Қызды болдым! Біздің қызымыз өмірге келді. Аллаға мың алғыс. Аиша аман! Аллаға шүкір», — деп жазды.
Жұлдыз жұп бұл жолы сәбилерін у-шусыз шығарып алуды жөн көріпті. Осылайша Аиша мен Бүркіттің екі ұл, екі қызы бар. Кенже қыздың есімін Латифа деп қойған.
Сәбиді қырқынан шығарған сәтті салған Айбек Жансейітов қырық қасық су құйып жатып: «Кішкентай ханшайымым! Ең бастысы, денсаулығың мықты болсын. Алла әлемдегі ең бақытты адамдардың қатарына қоссын сені, құлыншағым! Тілден, көзден сақтай көр, Алла! Сен біздің кішкентай ханшайымымызсың», — деп тілегін білдіріп, видео салды.
Еркебұлан Мырзабек
Белгілі әзілкеш Еркебұлан Мырзабектің отбасына биыл маусымда тағы бір атұстар өмірге келді. Ол сүйінші жаңалықты жеке парақшасында жариялады.
«Қош келдің мына өмірге, балам! Енді менде үш ҰЛ. Іссапарда, басқа елде жүріп осындай қуанышты хабар алып, мәз болып жатырмын. Фотода ұлыммен алғашқы бейнеқоңырау арқылы сөйлескенім. Білмеймін не жазарымды… Мәзбін, бақыттымын, қуанышым ішіме сыймай бара жатыр. Маған үшінші рет ұл сыйлаған келіншегімді құттықтаңдаршы», – деп жазды ол Instagram парақшасында.
Желі қолданушылары құттықтап, жылы лебізін білдірді.
«Бауы берік болсын, басына бақ қонған жігіт болсын!», «Өзіңізге ұқсаған ақылды азамат болсын!», «Келіншегіңіз батыр екен», – деп жазды желі қолданушылары. Айта кетейік, әзілкеш 2016 жылы шаңырақ көтерген.
Raim мен Ерке Есмахан
Танымал әнші Ерке Есмахан үшінші сәбиін дүниеге әкелді. Айта кетсек, оның экс-күйеуі Асхат Садырбайдан Мүсілім есімді бір ұлы бар. Ал белгілі әнші Райымбек Бақтыгерей екеуінің арасында екі ұл бар. Сүйінші жаңалықты да сәбидің әкесі алғашқылардың бірі болып хабарлады.
Шарананы қолына алып отырған суретін салған Raim: «Қош келдің, ұлым. Райымбек Батыр», – деп жазды.
Босанғаннан кейінгі жағдайы жайлы Ерке stories-ке арагіділік салып қояды.
Әсіресе, «енді қыз туып ал» деген пікірлерге ол былай деп жауап берген еді: «Босанғаныма 20 күн өтті. Тағы біраз шыдасам, серуендеуді бастаймын деген жоспарым бар. Бірақ үйде де қарап отырған жоқпын: күнде массаж қабылдаймын, ағылшын тілі сабағына қатысамын, сериал көремін. Үйдегілер әр жақта жүр, ал кішкентайымыз менің жанымда. Мен қыз бала тууды жоспарламаймын. Осы шешімімді қабылдаңыздар. Үш ұлым үшін Аллаға сансыз шүкір етемін» деп жазды.
Оған қоса жүкті кезінде Райымбектің қалай қолдау білдіргені туралы да бөлісті.
«Екі жылда екі бала босану оңай емес. Оны түсінген күйеуім Батырға аяғы ауыр кезімде көңіл-күйімді көтеру үшін бәрін жасады. Өздеріңіз куәсіздер. Соңғы айларда қатты ауырсынып жүргенде сыйлықты жаудырды. Қырқынан шығару кезінде де сыйлық алып берді. Әлі ашпадым да, тақпадым. Баршаңызға байдың қатыны болуды тіледім», – деген еді.
Ерекше сыйлықтың бірі деп Raim-ның ән шығарғанын да хабарлады.
«Жақында күйеуімнің барлық сыйлығын ысырып қоя салдым. Өйткені жолдасым маған баға жетпес сыйлық дайындады. Менің сахнаны сағынғанымды сезіп, өнер адамы екенім туралы әңгіме бастады. Сөйтіп, студияға мені отырғызып, өзінің маған арнап, ән шығарғанын айтты. Тыңдап, еңкілдеп, бір жылап алдым. Ең үлкен сый осы болды. Жақын арада сіздер де тыңдайсыздар. Райм, мен сені сүйемін», – деп бөлісті әнші.
Қайрат Нұртас пен Жұлдыз Әбдікәрімова
Еліміздегі ең танымал жұптың бірі — Қайрат Нұртас пен Жұлдыз Әбдікәрімованың шаңырағы тамызда тағы бір сәбимен толықты. Актриса бесінші баласын өмірге дін аман әкелді. Бұл жаңалықты ол перзентханадағы сәттен үзінді салып, қысқа-нұсқа «Жаңа тынысым» деп салып бөлісті. Жұлдыз жүкті екенін біразға дейін жасырды. Өміріндегі өзгеріс туралы жақында ғана жариялап, гендер-патиден де осы таяуда ғана видео салған болатын. У-шусыз, балаларымен қарапайым түрде өткізген іс-шарадан Қайрат Нұртас болған жоқ.
Біраздан соң әнші әзілдеп: «Жұмыста жүріп, түнделетіп қайттым. Мен жоқта гендер пати шырақтары жанып қызық болыпты. Байқадым…», – деп жазған еді.
Бұған дейін жұлдызды жұптың арасы алшақтап кетті деген сыбыс тараған болатын. Бірақ мына жаңалық сол күмәнді сейілткендей болды. Десе де, Жұлдыздың барлық жерде өзі жүргеніне оқырман әлі де күдігін жасырмайды.
Актриса «Қайырлы күн, жақсыларым! Жаным аман қалып, жарық дүниеге бөпемді дін аман-сау әкелгеніме шүкіршілік айтып жатырмын. Қалжаланып шілде терімді де шығарып, қалпыма келіп, барлық у-шуға тосқауыл қойдым. Әр сәтімнен ләззат алып, үйде жұмақ иісін иіскеп жатырмын. Аллаға сансыз шүкір, бәрі өз уақытымен өтті. Сондықтан да мен отадан қаштым. Осы жолы бәрі басқаша өтті, себебі қауіп-қатер болды», – деді.
Естеріңізге сала кетсек, бұған дейін жақында бөпелі болатын жұлдыздар туралы жазған едік.
