2025 жылы медициналық ұйымдарға 1,6 трлн теңге төленді
Әлеуметтік медициналық сақтандыру қоры 2025 жылы медициналық ұйымдарға 1,6 трлн теңге төледі. Бұл жоспардың 55%-ы.
1897 ұйым қаржысын алды
Медициналық көмек көрсету үшін ӘМСҚ жеткізушілермен жалпы көлемі 2,5 трлн теңгеге жуық келісімшарттар жасасты. Бұл 2025 жылы тегін медициналық көмектің кепілдендірілген көлемі (ТМККК) және міндетті әлеуметтік медициналық сақтандыру (МӘМС) аясында іске асты.
4 қыркүйектегі жағдай бойынша, елдегі 1905 медициналық ұйымның 1897-сіне төлем жасалды. Маусым айының төлемдері 99,6% деңгейінде жабылды. Қазір шілде айын жабу жұмыстары жалғасуда.
Төлемдердің бөлінісі
739,6 млрд теңге – ТМККК қызметтері (дәрі-дәрмекті қоспағанда);
597,9 млрд теңге – МӘМС қызметтері (дәрі-дәрмекті қоспағанда).
Сонымен қатар амбулаториялық дәрі-дәрмекпен қамтамасыз етуге 263 млрд теңге бөлінді.
Оның 226,6 млрд теңгесі ТМККК шеңберінде, 36,4 млрд теңгесі МӘМС шеңберінде бөлініп отыр.
«Сақтандыру» ақпараттық жүйесі
«СК-Фармация» ЖШС-мен келісімшарт аясында 52,6 млрд теңге (20%) аванс төленді, ал нақты орындалған сома – 125,1 млрд теңге.
Биылғы жылы барлық төлемдер «Сақтандыру» ақпараттық жүйесі арқылы толық көлемде жүзеге асырылу үстінде. Қордың мәліметінше, медициналық ұйымдарды уақтылы қаржыландыру үшін барлық қажетті шаралар қабылданып отыр. Дегенмен төлемдер ҚР Қаржы министрлігінен қаржы түсуіне қарай жүргізіледі.
Мұның алдында МӘМС арқылы қаржыландырылатын ең қымбат балалар операциялары аталған еді.
