Пәкістандық компания Қазақстанда цифрлық банк ашпақшы
Пәкістандық Welt Konnect компаниясы Қазақстанда цифрлық банк ашқысы келеді. Бұл жайлы компания өкілдері «KAZAKH INVEST» ҰК» АҚ басшылығымен кездесуінде айтты.
Welt Konnect Қазақстанда ірі инфрақұрылымдық бастамаларды іске асыруға, жаңартылатын энергетиканы дамытуға, туризмге, жылжымайтын мүлік пен құрылысқа қызығушылық білдірді. Компания елде цифрлық банк ашу туралы жоспарын да мәлімдеді.
«Қазақстан экономикадағы өңдеуші секторларға сапалы инвестиция тарту үшін жағдайды жүйелі түрде жасап келеді. Welt Konnect сияқты компаниялармен ынтымақтастық жасыл энергетика мен инфрақұрылым саласында жаңа бастамаларды іске асыруға және біздің елдеріміз арасындағы экономикалық байланыстарды нығайтуға мүмкіндік беретініне сенімдіміз», – деді «KAZAKH INVEST» ҰК» АҚ басқарма басшысы Мадияр Сұлтанбек.
Ал Welt Konnect жетекшісі Барристер Хабил Ахмед Хан компаниясының Қазақстанды Орталық Азиядағы басым әріптес ретінде қарастыратынын атап өтті. Ол елдің жасыл энергетика мен инфрақұрылым саласында жоғары әлеуетке ие екенін, инвестиция үшін қолайлы жағдай жасалғанын атап өтті.
Welt Konnect – штаб-пәтері Исламабадта орналасқан, энергетика және инфрақұрылым саласындағы инжинирингтік және девелоперлік қызметтерге маманданған жеке компания. Компания Пәкістанда, Сауд Арабиясында, Германияда және Қытайда жобаларды жүзеге асырады, орнықты даму, инновациялар және энергетика саласын жаңғырту бағытында жұмыс істейді.
