Рим папасы Астанадағы съезге жиналғандарға сәлем жолдады

Рим папасы Лео XIV хат жіберіп, әлемдік және дәстүрлі діндер лидерлерінің VIII съезіне қатысушының бәріне сәлем жолдаған.

Хатты жиынға қатысушылардың бірі оқып берді.

«Сіздер жер шарының түкпір-түкпірінен келіп, достық байланыстарды жаңғырту, жаңа достық қарым-қатынас орнату және бөлшектенген, жаралы әлемімізді сауықтыруға деген ортақ ұмтылыс жолында бас қостыңыздар. Бұл тақырып аса өзекті, өйткені ол зорлық-зомбылық пен қақтығыстар белең алған заманда діндер арасындағы диалогтың маңызды рөлін айқындайды», – делінген хатта.

Рим папасының сөзінше, синергия – бір-бірімізбен және Құдіретпен бірлесіп жұмыс істеу. Әрбір шынайы діни дәстүр диалог пен ынтымақтастыққа негізделген, адамдар мен халықтарды байланыстыратын өзара тәуелділікті табиғи түрде сезінуге сүйенеді.

Католик шіркеуі өз тарапынан басқа діндердегі ақиқат пен қасиеттің бәрін мойындайды және бағалайды. Ол шынайы синергияны дамытуға, әрбір дәстүрдің ерекше сыйын ортақ диалог алаңына әкелуге тырысады, мұнда әрбір сенім өкілі өз даналығы мен жанашырлығын ортақ игілік жолында ұсынады.

Айтуынша, біз көз алдымызға елестететін бейбітшілік, бауырластық пен ынтымақ үйлескен болашақ барша жүректің бір болып жұмылуын қажет етеді. Дін лидерлері қоғамның ең әлсіз мүшелерін қорғау үшін бірлескенде, ортақ үйімізді қорғау үшін ағаш отырғызғанда немесе адам қадір-қасиетін қорғауда бірауыздан үн көтергенде, олар сенімнің бөлуден гөрі адамдарды көбірек біріктіретінін дәлелдейді. Осылайша, синергия қуатты күшке айналады.