Атом энергиясы жөніндегі агенттік төрағасы Алмасадам Сәтқалиев электр қуатының тарифінің көтерілуіне АЭС құрылысының қатысы жоқ екенін мәлімдеді.
Сәтқалиев бұл мәселені құзырлы органдар қадағалайтынын алға тартып отыр.
Мәжіліс дәлізінде Алмасадам Сәтқалиевке: «Алматы қаласы мен Алматы облысында қазан айынан бастап электр қуатының тарифтері өсетіні мәлім. Үлкен ауылы үшін бөлек тариф бөлінген. Бұл АЭС салумен байланысты ма», – деген сауал қойылды.
Агенттік төрағасы Алмасадам Сәтқалиев мұны үзілді-кесілді жоққа шығарды.
«Мұның АЭС салуға ешқандай қатысы жоқ. Тиісті алгоритм, тиісті тұтынушылар тобы бар. Энергетика министрлігіндегі бұл есептерді құзыры шеңберінде бәсекелестікті қорғау агенттігі тексереді», – деді Алмасадам Сәтқалиев.
Сонымен қатар, еліміздегі екінші АЭС құрылысы да Алматы облысында салынғалы отыр.
