Астанадағы ең үлкен сауда орталығы қашан ашылады

Астанада салынып жатқан Ellington туристік ауданы құрылысы 2028 жылға қарай аяқталуы мүмкін. Бұл туралы қаланың инвестициялар және кәсіпкерлікті дамыту басқармасы басшысы Халел Әкімжанов айтты.

«Қалада ең үлкен сауда ойын-сауық орталығы салынып жатыр. Ол жерде аквапарк болады. Құрылысы 2-3 жылда аяқталады деп жоспарланған. Шетелдік компания өз қаражатына салынып жатыр, бюджеттен ақша бөлінбеген. Әкімдік тарапынан су, кәріз инфрақұрылымын тарту бойынша көмек көрсетіліп жатыр», – дейді Әкімжанов.

Бұған дейін қалада көпфункционалды туристік аудан құру инвестиция жобасын іске асыру мақсатында Астана әкімдігі мен «Ellington Group KAZ» Ltd компаниясы арасында меморандумға қол қойылды. Жоба құны шамамен 1 млрд доллар екені айтылды. Құрылыс 2020 жылы басталып, 2027 жылға дейін аяқталады деп жоспарланды.

Үкіметтің хабарлауынша, кешен аумағы – 2,6 млн шаршы метр, қосымша құрылыстар аумағы – 333 га. Мұнда аумағы 15 мың шаршы метр болатын аквапарк, ойын аймағы, саябақтар, террасалар, кеңсе және коммерциялық үй-жай, қонақүйлер, әлеуметтік және тұрғын үйлер болады.