Дастан Сәтпаев Қазақстан құрамасына көмектесе алмайды

Қайрат» футбол клубының ардагері Құралбек Ордабаев Дастан Сәтпаевтың Қазақстан ұлттық құрамасына шақырылуына байланысты туындаған жағдайға пікір білдірді.

Оның айтуынша, соңғы матч алдында жас ойыншы өзін жайсыз сезінгенімен, командаға көмектескісі келіп, бұл туралы ешкімге айтпаған. Соған қарамастан, толық ойын өткізіп, тіпті гол соққан.

«Матчтан кейін ауырсыну күшейіп, Дастан медициналық штабқа жүгінуге мәжбүр болды. Тексеру нәтижесінде сол жақ жамбас бұлшықетінде шамамен төрт сантиметрге жуық ісіну, сіңірдің созылуы мен микрожарықтар анықталды. Бұл жас ағза үшін айтарлықтай жүктеме, сондықтан дәрігерлер оған клуб базасында қалып, толық қалпына келу курсынан өтуді ұсынды. Клуб бұл жағдайды ұлттық құраманың медициналық штабымен келісіп, ресми түрде хабарлады», – деді Ордабаев.

Осыған байланысты Дастан Сәтпаев бұл жолы Қазақстан құрамасына көмектесе алмайды.

Құралбек Ордабаев футболшылардың ұлттық құрамаға қатысуға әрдайым ниетті екенін атап өтті:

«Жігіттеріміз ешқашан құрамадан бас тартпайды. «Қайрат» ойыншылары үшін Қазақстан намысын қорғау үлкен мәртебе. Ең бастысы Дастанның толық сауығып, жаңа күшпен оралуы. Ол әлі де клубқа да, ұлттық құрамаға да үлкен пайдасын тигізе алады», – деді клуб ардагері.

Еске сала кетейік, бұған дейін ұлттық құрамаға алғаш рет Дінмұхамед Қашкен шақырту алғанын жазған едік.