Швейцариядағы Халықаралық менеджментті дамыту институты (IMD) 2025 жылғы Дүниежүзілік бәсекеге қабілеттілік рейтингін жариялады. Бұл тізімде Қазақстан оң динамика көрсетіп, 69 елдің ішінде өз позициясын нығайтты.
IMD зерттеуі ұлттық экономикалардың тиімділігін төрт негізгі бағыт бойынша бағалап отыр. Оған экономиканың жағдайы, үкіметтің тиімділігі, бизнестің тиімділігі және инфрақұрылым кіреді.
Рейтинг мәліметтеріне сәйкес, Қазақстан іскерлік ортаны нығайту, мемлекеттік басқарудың ашықтығын арттыру және адами капиталды дамыту бағытында сенімді түрде алға жылжып келеді. Сарапшылардың айтуынша, соңғы жылдары елде саяси жүйенің болжамдылығын және ашықтығын арттыруға, кәсіпкерлікті қолдауға және мемлекеттік қызметтерді цифрландыруға бағытталған ауқымды реформалар жүргізілуде.
Аналитикалық қауымдастық өкілдері Қазақстанның IMD рейтингіндегі позицияларының жақсаруы жүйелі өзгерістердің нәтижесін көрсететінін атап өтті. Олардың қатарына жаңа реттеу тетіктерін енгізу, бизнес-процестерді жеңілдету, қаржы институттарын дамыту және мемлекеттік қызмет сапасын арттыру жатады.
«IMD рейтингіндегі өсім — бұл Қазақстанның орнықты даму жолында келе жатқанын, реформалар мен заң үстемдігі қағидаттарына берік екенін білдіретін халықаралық инвесторлар үшін маңызды белгі», — дейді сарапшылар.
Жалпы, Қазақстанның IMD бәсекеге қабілеттілік жөніндегі дүниежүзілік рейтингке қатысуы жүргізіліп жатқан реформалардың тиімділігінің маңызды сыртқы көрсеткіші болып табылады. Сондай-ақ ашық, әділ әрі қарқынды дамып келе жатқан экономиканы құру жолындағы бағытты растайды.
Еске салайық, жыл басында Қазақстан халықаралық бәсекелестікке қабілеттілік рейтингінде Жапония мен Түркияны басып озған болатын.
