2026 жылы Қазақстан Еуразиялық экономикалық одаққа төрағалық етеді

ТМД жаңа тарихи жағдайда мемлекеттер арасындағы сенімді арттырудың халықаралық тетігі ретінде сұранысқа ие құрылым екенін дәлелдеді. Қасым-Жомарт Тоқаев ұйымның 35 жылдығы қарсаңында осылай деп мәлімдеді.

Тоқаевтың айтуынша, сауда және экономика саласындағы ынтымақтастық басты басымдық болуы тиіс. 2024 жылы ТМД елдерінің өзара тауар айналымы 8%-ға өсіп, 110 млрд долларға жетті. Ал Қазақстанның ТМД елдерімен саудасы соңғы бес жылда 1,5 есеге артып, 38 млрд долларға жеткен.

«Бұл көрсеткіш Ұйымның сауда-экономикалық әлеуетін танытады және әлі де мүмкіндіктердің бар екенін байқатады. Сауда-экономикалық ынтымақтастықты одан әрі арттыруға қажетті институттық және құқықтық базамыз бар», – деді Мемлекет басшысы.

Ол қызмет көрсету нарықтарына қол жеткізуді жеңілдетуді, бірлескен өндірістерді іске қосуды, көлік байланыстарын дамытуды, инвестиция тартуды және цифрлық технологияларды енгізуді ұсынды.

Тоқаев 2026 жылдың сәуірінде Астанада БҰҰ аясында халықаралық форум өткізуды ұсынды. Бұл алаңда ТМД елдерінің сарапшылары қауіпсіздік пен даму саласындағы жаһандық сын-қатерлерді талқылай алады. Сондай-ақ 2026 жылы Қазақстан Еуразиялық экономикалық одаққа (ЕАЭО) төрағалық етіп, Еуразиялық экономикалық форум өткізеді. Тоқаев ТМД елдерінің әріптестерін белсенді қатысуға шақырып, форумды ЕАЭО мен ТМД-ның бірлескен іс-шарасы ретінде өткізуді ұсынды.