АҚШ, Түркия, Мысыр мен Катар Газадағы атысты тоқтату туралы декларацияға қол қойды

Мысырдың Шарм-эш-Шейх қаласында 20-дан астам елдің басшыларының қатысуымен Халықаралық «бейбітшілік саммиті» өтуде. Онда АҚШ, Түркия, Мысыр мен Катар «Газадағы соғысты аяқтау туралы келісімге» қол қойды.

Декларацияға қол қойылды

Палестина мен Израиль арасындағы делдал елдердің өкілдері Газа секторында атысты тоқтату туралы Декларацияға қол қойды. Осылайша Израиль мен ХАМАС террористік тобы арасындағы келісім ресми күшіне енді. АҚШ, Түркия, Мысыр мен Катар осы келісімнің кепілді өкілдері болды.

АҚШ президенті Дональд Трамптың айтуынша, декларацияда екі жыл бұрын басталған Газа секторындағы Израиль мен ХАМАС арасындағы соғысты аяқтау жолындағы одан әрі қадамдар туралы «ережелер» белгіленген. Трамп бұл күнді «бүкіл әлем мен Таяу Шығыс үшін керемет күн» деп атады.

Келісімнің алғашқы кезеңі

Осыған дейін Газа аймағындағы атыс тоқтап, 737 күн бойы ХАМАС тұтқында болған Израиль азаматтарының босатылған. 

13 қазанда Мысырда халықаралық «бейбітшілік саммиті» өтуде. Рәсімге делдал елдер мен Израиль өкілдері қатысып жатыр. ХАМАС тобы келісімге қол қоюға қатыспайтынын хабарлаған.