Қытай компаниясы 9,5 млрд теңге айыппұл төлемей жүр

Қазақстандағы соттар «КоЖаН» қытай компаниясын Атырау облысындағы жерлерді ластағаны үшін 9,5 млрд теңге айыппұл төлеуге міндеттеген. Алайда қаражат бюджетке әлі түспеді. Бұл туралы жергілікті «Ақ Жайық» газеті жазды.

Басылым мәліметінше, 2024 жылы экология басқармасы Жылыой ауданындағы «Морское» мұнай кен орнын игеретін компания бұрғыларынан мұнай жерге төңілгенін анықтаған. Тексеру барысында құжат бойынша ол жерге бұрғы түспеуі керек екені мәлім болған.

Компания үстінен осыған қатысты іс қозғалып, сот оны кінәлі деп тапты. Апелляциялық сот та шешімді өзгертпеді.

Алайда, газет мәліметінше, іске Бас прокуратура араласқан. Құзырлы мекеме істі қарау барысынан олқылық тауып, Жоғарғы сотқа арызданған.

«27 маусымда, сот реформасы басталардан үш күн бұрын, Жоғарғы сот осы істі қарап үлгеріп, төменгі инстанциялар шешімін жойды. Сол кезде материалдардың барлығы дерлік жаңа кассациялық сотқа өткізіліп жатқан, бірақ «Кожан» ісі шешімге дейін сонда қалған», – деп жазды «Ақ Жайық».

Енді материалдар тағы да сотта қаралып жатыр. Түпкілікті шешім әлі қабылданған жоқ.

Қазақстан қор биржасының (KASE) мәліметінше, былтыр «Кожан» 7,7 млрд теңге таза табыс тапқан. Қытай компаниясы Атырау облысында үш мұнай кен орнын (Морское, Қаратал және Дәулетәлі) игереді. Активтердің жалпы құны 100 млрд теңгеден асады.

Компанияның жалғыз акционері – «Матен Петролеум» қытай компаниясы. Ол да Мәтін, Қара-Арна және Шығыс Көкарна кен орындарын игереді.