Кәрім Мәсімовтің суық қаруы жоспарланған бағадан қымбат сатылды
Сотталған ҰҚК экс-басшысы Кәрім Мәсімовтің коллекциясындағы барлық дерлік суық қаруы сауда-саттықта сатылды, деп хабарлайды Kursiv.Media.
Қайтарылған активтерді басқару компаниясы хабарлағандай, антикварлық және кәдесый қылыштары, балталар мен қанжарлар бастапқы бағадан 2,2 млн теңгеге қымбатқа сатылды.
Астанадағы Мәсімов сарайынан алынған суық қару топтамасында 25 зат болған. Ең қымбат заттар екі қылыш болды: оның бірі қынаптағы 930 мың теңгелік, екіншісі сары металлдан жасалған — 837 мың теңге, ал ең арзан мүлік — әрқайсысы 38,4 мың теңгеден «Айбалта».
«2025 жылы компанияның аукциондарында жалпы сомасы 6,5 млн теңгеге 24 бірлік суық және кәдесый қаруы (қылыштар, қанжарлар, балталар) сатылды, бастапқы құны 4,3 млн теңге», — делінген жауапта.
Олар тек бір затты — қынаптағы самурай қылышын сатқан жоқ. Ол бойынша сауда-саттық 2025 жылғы 4 қарашаға белгіленді, бастапқы бағасы — 542 мың теңге.
Мәсімов сарайынан тағы не сатылды
Сатылған активтердің ішінде антиквариат пен кәдесый заттары да бар. Мәселен, «Бәйтерек», «Астана» және «Қазақстан картасы бар Монета» коллекциялық монеталары бір лотпен 198,8 мың теңгеге сатылды.
Montegrappa Italia және Visconti Firenze жазбаша қаламдары тиісінше 440 мың және 402 мың теңгеге кетті.
Компания хабарлағандай, барлығы 2023 жылдан 2025 жылға дейін 74 мүліктің 65-і сатылған. Сауда-саттық кезең-кезеңімен 15% және 30% жеңілдікпен жүргізілді. Сатудың орташа бағасы бастапқы бағадан асып түсті.
Қалған тоғыз лот бойынша, оның ішінде «Алтын адам», «Тәуелсіздікке 20 жыл», «Қазақстан фаунасы» монеталары және ұлттық ою-өрнегі бар былғары белбеу бойынша қайта сауда-саттық өткізіледі.
Бұған дейін Мәсімовтің 1,6 миллиард теңгелік сарайы сатылмай қалғаннан кейін Білім министрлігіне берілгенін жазған едік. Бастапқыда үйді Астана әкімдігіне беру жоспарланған болатын, алайда білім басқармасы санитарлық талаптарға сәйкес келмегендіктен нысаннан бас тартты.
