Chevrolet Cobalt-тың басты бәсекелесі пайда болмақ. Ол – Kia Soluto. 1,4 литрлік атмосфералық қозғалтқышпен жабдықталған шағын седан Қазақстанда биыл жылдың соңына дейін сатылымға шығады.
Бюджеттік сегментте жаңа модель
Kia компаниясының ресми дистрибьюторының мәліметінше, Soluto моделі Қазақстан нарығына 2025 жылдың соңына дейін шығарылады. Кейбір елдерде бұл көлік Kia Pegas («Киа Пегас») атауымен де белгілі. Автомобиль күнделікті жүруге арналған қолжетімді әрі сенімді көлік ретінде ұсынылады.
Капот астында қуаты 95 ат күшіне тең 1,4 литрлік атмосфералық қозғалтқыш орнатылған. Ол 5 сатылы механикалық немесе 4 сатылы автоматты беріліс қорабымен жұмыс істейді. Қазақстанда тек автоматты нұсқасы сатылады. Қарапайым құрылымы мен техникалық қызмет көрсету шығындарының төмендігі Soluto-ны сенімді таңдау етеді. Бұл корей седаны артық төлемсіз көлік іздегендер үшін тиімді нұсқа болмақ.
Chevrolet Cobalt-қа бәсеке
Kia Soluto Қазақстанда қолжетімді седандар арасында ұзақ уақыт бойы эталон саналып келген Chevrolet Cobalt-қа нағыз бәсеке бола алады.
Көліктің ресми дилерлердегі бағасы шамамен 8 млн теңге болады деп күтілуде. Бұл баға Soluto-ны қазіргі таңда «Кобальт» үстемдік етіп тұрған баға сегментіне дәл орналастырады. Сонымен қатар Soluto заманауи дизайнымен, 475 литрлік кең жүксалғышымен және Kia брендіне тән сенімділігімен сатып алушыларды өзіне тарта алады. Жабдықталу тізіміне круиз-бақылау, кондиционер, орындық жылытқыштар мен артқы көрініс камерасы бар мультимедиялық жүйе кіреді.
Сенімді және ұтымды шешім
Soluto-ның басты артықшылығы – сенімділік. Бұл көлікте турбоқондырғы, вариатор немесе күрделі электроника жоқ. Ол ұзақ мерзімділікке, техникалық қызмет көрсетуге кететін төмен шығындарға және болжамды пайдалануға бағытталған, бұл Қазақстан жолдары мен ауа райы жағдайында өте маңызды.
«Қарапайым әрі сенімді атмосфералық мотор, өте қарапайым төрт сатылы автомат, бұл жақсы нарықтық әлеуеті бар бюджеттік модель болады», – деп жазды Автонарықты талдау және мониторинг агенттігінің директоры Артур Мискарян Telegram-арнасында.
Еске салайық, Қазақстанда Kia Sorento көлігінің отандық нарыққа арнайы әзірленген шектеулі сериясы –Tulpar сатылымға шықты. Модельдің бағасы 23,99 млн теңгеден басталады.
