Ұлттық банк Қаржы нарығын реттеу және дамыту агенттігімен бірлесіп тұтынушылық несие бойынша шекті жылдық тиімді сыйақы мөлшерлемесін (ЖТСМ) 56%-дан 46%-ға дейін төмендетті. Енді оны 40%-ға дейін төмендетуді қарастырып жатыр. Бұл туралы үкімет отырысында Ұлттық банк төрағасы Тимур Сүлейменов айтты.
Несиедегі ЖТСМ деген не?
ЖТСМ-нің 56%-дан 46%-ға дейін төмендеуі тұтынушы үшін несие сәл арзандауы мүмкін дегенді білдіреді.
Жылдық тиімді сыйақы мөлшерлемесі (ЖТСМ) – сіз несие алған кезде төлейтін барлық шығындардың жылдық пайыздық көрінісі. Оның ішіне банктің негізгі пайыздық мөлшерлемесі, барлық комиссиялар мен төлемдер, қосымша міндетті шығындар кіреді.
Мәселен, тұтынушы бір жылға 1 млн теңге несие алатын болса, 56% ЖТСМ-мен жалпы төлемі 1 328 600 тг болады.
ЖТСМ төмендесеңіз, несиеңіз қаншалықты арзандайды?
Ал ЖТСМ 46%-ға түссе, онда миллион теңге несиені бір жылда 1 266 300 тг етіп қайтарасыз. Яғни, шекті пайыз 56%-дан 46%-ға түссе, 1 млн теңге несиенің жылдық шығыны шамамен 62 мың теңгеге азаяды. Ал Ұлттық банк уәде еткендей ЖТСМ тағы 40%-ға дейін түссе, тағы 36.6 мың теңге үнемделуі мүмкін.
| ЖТСМ (жылдық тиімді мөлшерлеме) | Ай сайынғы төлем (шамамен) | Жалпы төлем (12 айда) | Артық төлем (пайыз + комиссия) |
|---|---|---|---|
| 🟥 56% | 110 700 тг | 1 328 400 тг | 328 400 тг |
| 🟧 46% | 105 500 тг | 1 266 000 тг | 266 000 тг |
| 🟩 40% | 102 500 тг | 1 230 000 тг | 230 000 тг |
Сарапшылар сөзінше, шекті пайыздың төмендеуі жақсы, бірақ барлық жағдайда несие арзандайды дегенді білдірмейді. Кейде банктер шарттарды қатаңдатып, қосымша төлем енгізуі мүмкін.
Екі жыл бұрын ҚНРДА жылдық тиімді сыйақы мөлшерлемесін 42% деңгейіне дейін төмендетуді ұсынған еді.
