«Бәйтерек» жыл соңына дейін инвестициялық холдингке айналады. Үкімет «Байтерек» холдингін трансформациядан өткізу арқылы елге инвестиция тарту тетіктерін күшейту және экономикалық өсімді жеделдетуді жоспарлап отыр. Бұл шешім – 2029 жылға дейін ішкі жалпы өнімді екі есе арттыруға бағытталған саясаттың маңызды бөлігі.
Жаңа инвестициялық модель
Алдағы төрт жылда мемлекет жыл сайын «Бәйтерек» холдингінің капитализациясы 1 трлн теңгеге артырады. Сонымен қатар холдинг жылына 8 трлн теңгеге дейін сырттан инвестиция тартуы керек. Қаражат экономиканың басым секторларындағы ірі инфрақұрылымдық және өнеркәсіптік жобаларды қаржыландыруға бағытталады.
Вице-премьер – ұлттық экономика министрі Серік Жұманғаринның айтуынша, «Бәйтерек» енді экономикалық саясатты жүзеге асыратын негізгі институтқа айналады.
«Холдинг жаңа модель бойынша инвестициялар тартудың басты орталығына айналып, стратегиялық жобаларға қолдау көрсетеді. Бұл – проактивті экономикалық өсім саясатын іске асырудың негізгі құралы», – делінген хабарламада.
Трансформация аясында «Бәйтерек» холдингінің басқару моделі де қайта қаралады. Қазіргі басқарушы холдингтің құрылымы жаңа инвестициялық міндеттерге сай оңтайландырылады.
«Бәйтерек» ұлттық басқарушы холдингі» – Қазақстан экономикасын әртараптандыру, инновацияларды қолдау, экспортты дамыту, еңбек өнімділігін ұлғайтуды қолдайтын, оны дамыту жөніндегі міндеттерді іске асыруды қамтамасыз ететін ұлттық институт. Холдинг 2013 жылы Қазақстан Президентінің Жарлығымен құрылды.
