«Қасбетін қалдырамыз»: Алматы билігі №56 мектептің жөнделуі жайлы

Әлеуметтік желіде авторлардың бірі Алматыдағы Қаныш Сәтбаев атындағы №56 мектеп-гимназиясының ғимараты қирап жатыр деп мәлімдеген видео тарады.

Кадрлардан жұмысшылардың ғимараттың төбесінде бетон бұзатын ауыр балғаны қолданғаны көрінеді. Пост авторы қаланың «тарихи келбетін жоғалтып жатқанын» айтып, бұл мектеп – сақтауға тиіс кеңестік ампир стилінің үлгісі деп мәлімдеді.

Алайда Алматы қаласының құрылыс басқармасы бұл мәлімдемелерді жоққа шығарды.

«Мектепте сейсмикалық нығайту және күрделі жөндеу жұмыстары жүргізіліп жатыр. Бар ғимараттарды сүру көзделмеген. Ғимараттың тарихи қасбеті сақталады», – деді ведомство өкілдері.

Басқарма қайта жаңарту жобасы қазіргі білім беру стандарттарына сай оқу кеңістіктерін көздейтінін нақтылап өтеді. Сондай-ақ көпфункционалды спорт кешенін салу, асхананы, кітапхана мен оқу залдарын жаңарту, үйірмелерге арналған жеке бөлмелер жабдықтау жоспарланып отыр.

Құрылыс жұмыстарын 2026 жылдың сәуірінде аяқтау жоспарланған. Бас мердігер – «Астана-Стройинвест» корпорациясы.

Kompra порталының дерегінше, аталған компания Евгения Шинге тиесілі. Интернеттегі сілтемелерге қарағанда, оның компаниясын жауапсыз мемлекеттік сатып алу қатысушыларының тізіліміне енгізуге тырысқан. Алайда сілтеменің өзіне өткен кезде порталда мұндай ақпарат көрсетілмейді.

Threads желісінің өзінде мектептің «құлатылуы» туралы пікір екіге жарылды. Кейбір қолданушылар Алматының осылайша КСРО дәуірінің әсерінен арылып жатқанына қуанып отыр, ал қалғандары бұл – ел тарихының бір бөлігі екенін, оны сақтау маңызды екенін алға тартады.