Алматыдағы Бостандық ауданының әкімі болып Азамат Қалдыбеков тағайындалды

Алматы әкімі Бостандық ауданының әкімі болып Азамат Қалдыбеков тағайындалды. Бұл туралы қала әкімінің баспасөз қызметі хабарлайды.

Азамат Қалдыбеков 1984 жылы 11 қазанда туған. Әл-Фараби атындағы Қазақ ұлттық университетін «Халықаралық құқық» мамандығы бойынша тәмамдаған. «Болашақ» бағдарламасы бойынша АҚШ-тағы Дьюк университетінде құқық магистрі дәрежесін алған. Қазақ ұлттық аграрлық зерттеу университетінде философия докторы (PhD) ғылыми дәрежесін қорғаған.

Еңбек жолын 2007 жылы Алматы қаласы Бостандық ауданының №2 аудандық сотында жетекші маман қызметінен бастаған.

Әр жылдары ҚР Ұлттық банкі, «Самұрық-Қазына» АҚ, «Азаматтарға арналған үкімет» мемлекеттік корпорациясы» КЕАҚ құрылымдарында жұмыс істеді. 2019 жылы Бірінші президенттік жастар кадрлық резервіне енді.

2020-2024 жылдары Алматы қаласы Алатау ауданының әкімі болып жұмыс істеді.

2024 жылдан осы уақытқа дейін Алматы қаласы әкімінің орынбасары қызметін атқарды.

Бостандық – Алматыдағы ғылыми, мәдени және іскерлік нысандар көбірек шоғырланған әкімшілік аумақ. Қаладағы ең ірі және орталық аудан деп есептеледі. Халық саны – 335 456 адам.

Осы жылы аудан әкімдігі Жаңа жыл қарсаңындағы безендіру жұмыстарына 178,5 млн теңге бөлуді жоспарлап отыр.