4 қарашада Қазақстан қор биржасындағы (KASE) күндізгі сауда нәтижесінде 1 доллар 522,49 теңге болды. Ұлттық валюта бір тәулікте бірден 5,42 теңгеге нығайды.
Дүйсенбі күні KASE-дегі доллар саудасы 525,20 теңгемен жабылған. АҚШ валютасы бүгін де арзандады.
Астана уақытымен сағат 15:40-тағы мәліметке сәйкес, биржада шамамен 156 млрд теңгеге, яғни 300 млн долларға валюта саудасы жасалды. Бұл әдеттегі көрсеткіштен әлдеқайда жоғары. Ұлттық банк инвертенция, яғни теңгені қолдан көтеру шарасын жүргізіп жатқаны туралы ешқандай мәлімет таратпады.
Бір айдың ішінде ұлттық валюта шамамен 25 теңгеге нығайды. 30 қыркүйекте қор биржасындағы ресми бағам 548,96 теңге болған. Осыдан-ақ теңге нығаю көрсеткіші жағынан өзіндік рекорд орнатып отыр.
Елдегі валюта айырбастау мекемелері мен екінші деңгейлі банктерде де доллар әжептәуір арзандады. Kurs.kz мәліметінше, Алматы қаласындағы ақша айырбастау пунктерінде 525 теңгеден қабылданып, 526,5 теңгеден сатылып жатыр. Астана қаласында, әдеттегідей, бағам сәл жоғары – 523 және 530 теңге.
