Астанада қайтыс болған фельдшердің отбасына материалдық көмек көрсетіледі

Астана әкімдігі қызметі кезінде қаза тапқан жедел жәрдем фельдшері Ұлдана Қалдарханқызының отбасына материалдық көмек көрсетеді.

Қала әкімдігі қайтыс болған фельдшердің туыстарына көңіл айтып, отбасына жан-жақты қолдау көрсетілетінін атап өтті. Материалдық көмек төленеді, жерлеу рәсімін ұйымдастыруға жұмсалатын шығындарды өтейді және сақтандыру төлемін белгіленген тәртіппен рәсімдейді.

«Қаза тапқан жанның отбасына материалдық көмекті қоса алғанда, жан-жақты қолдау көрсету, сондай-ақ жерлеу рәсімін ұйымдастыруға байланысты шығындарды жабу жоспарлануда. Сондай-ақ белгіленген тәртіппен сақтандыру төлемі көзделетін болады», – делінген хабарламада.

Еске салайық, 8 қараша күні Астанадағы тұрғын үйдің қасбеті құлаған. Сол кезде көмекке келген екі фельдшердің басына кондиционер құлап, жалпы 5 адам жарақат алған. Екі фельдшер ауыр жағдайда ауруханаға түскен.  18 қарашада Ұлдан Қалдырханқызының қайтыс болғаны белгілі болған.

Президент Қасым-Жомарт Тоқаевтың жарлығымен марқұм «Ерлігі үшін» медалімен марапатталуы тиіс.